இந்தியா வரை பரவியதா எபோலா? உகண்டா பெண் பெங்களூரில் தனிமைப்படுத்தல்!
ஆப்பிரிக்க நாடுகளில் பேரழிவை ஏற்படுத்தி வரும் கொடிய எபோலா (Ebola) வைரஸ் தொற்று தமக்கு ஏற்பட்டிருக்கலாம் என்ற சந்தேகத்தின் பேரில், உகண்டா நாட்டைச் சேர்ந்த பெண் ஒருவர் இந்தியாவின் பெங்களூர் தொழில்நுட்ப மையத்தில் (Bangalore Tech Hub) அவசரமாக தனிமைப்படுத்தல் செய்யப்பட்டுள்ளதாக இந்திய ஊடகங்கள் செய்தி வெளியிட்டுள்ளன.
இந்தக் காவிப் பெண்ணுக்கு எபோலா தொற்று இருப்பது மருத்துவப் பரிசோதனைகளில் உறுதிசெய்யப்பட்டால், கடந்த 2014ஆம் ஆண்டிற்குப் பின்னர் தெற்காசிய நாடொன்றில் பதிவாகும் முதலாவது எபோலா நோயாளி இவராகவே இருப்பார் எனச் சுட்டிக்காட்டப்பட்டுள்ளது.
"இந்தியாவில் இதுவரை எபோலா நோயாளர்கள் எவரும் அடையாளப்படுத்தப்படவில்லை" என இந்திய மத்திய சுகாதார அமைச்சு உத்தியோகபூர்வமாக அறிவித்த அடுத்த நாடே இந்த அதிர்ச்சித் தகவல் வெளியாகியுள்ளது.
பாதிக்கப்பட்டதாகச் சந்தேகிக்கப்படும் இந்த 28 வயதுடைய உகண்டா நாட்டுப் பெண், கிழக்கு ஆப்பிரிக்காவில் இருந்து இந்தியாவுக்கு வருகை தந்துள்ளார்.
இவர் முதலில் அகமதாபாத் நகருக்கு வந்து, அங்கிருந்தே தென்னிந்தியாவின் பெங்களூர் நகரை வந்தடைந்துள்ளார்.
தற்பொழுது இவருக்கு லேசான உடல் வலி (Body pain) மாத்திரமே காணப்படுவதுடன், அவர் சாதாரண ஆரோக்கிய நிலையிலேயே உள்ளார் என மருத்துவர்கள் தெரிவித்துள்ளனர்.
எனினும், அவரிடம் இருந்து பெறப்பட்ட இரத்த மாதிரிகளின் (Blood Samples) இறுதிப் பரிசோதனை முடிவுகள் இதுவரை வெளிவரவில்லை எனத் தெரிவிக்கப்பட்டுள்ளது.
இந்தச் சம்பவத்தை அடுத்து, இந்தியாவிலுள்ள அனைத்து சர்வதேச விமான நிலையங்கள் மற்றும் எல்லை நுழைவாயில்களில் ஆப்பிரிக்க நாடுகளிலிருந்து வரும் பயணிகளைப் பரிசோதிப்பதற்கான உத்தேச அவசர கண்காணிப்பு நடவடிக்கைகள் (Surveillance measures) தீவிரப்படுத்தப்பட்டுள்ளன.
இது தொடர்பான அவசர வழிகாட்டு நெறிமுறைகளையும் இந்திய அரசு வெளியிட்டுள்ளது.
அத்துடன், தற்பொழுது எபோலா தீவிரமாகப் பரவி வரும் பின்வரும் ஆப்பிரிக்க நாடுகளுக்கான அத்தியாவசியமற்ற பயணங்களைத் தவிர்க்குமாறு இந்திய அரசு தன் நாட்டுப் பிரஜைகளைக் கேட்டுக்கொண்டுள்ளது:
காங்கோ (DR Congo)
உகண்டா (Uganda)
தெற்கு சூடான் (South Sudan)
இந்த எபோலா அச்சுறுத்தல் காரணமாக, புதுடெல்லியில் மிக பிரம்மாண்டமாக நடத்த திட்டமிடப்பட்டிருந்த 'இந்தியா-ஆப்பிரிக்கா மன்ற உச்சி மாநாடு' (India-Africa Forum Summit) காலவரையறையின்றி ஒத்திவைக்கப்பட்டுள்ளதாக இந்திய வெளிவிவகார அமைச்சு அறிவித்துள்ளது.
உலக சுகாதார ஸ்தாபனத்தின் (WHO) தற்போதைய உத்தியோகபூர்வ தரவுகளின்படி, உலகளாவிய ரீதியில் எபோலா தொற்று அறிகுறியுடன் 900க்கும் மேற்பட்ட சந்தேகத்திற்குரிய நோயாளர்கள் அடையாளப்படுத்தப்பட்டுள்ளனர்.
அவர்களில் 101 பேருக்கு உலகில் மிக அரிதாகக் காணப்படும் கொடிய 'புன்டிபுகியோ' (Bundibugyo) என்ற எபோலா வைரஸ் வீரியம் தொற்றியுள்ளமை உறுதி செய்யப்பட்டுள்ளது.
இந்த விசேட வைரஸ் வீரியத்திற்கு எதிராகப் பயன்படுத்தக்கூடிய அங்கீகரிக்கப்பட்ட தடுப்பூசிகளோ (Vaccines) அல்லது பிரத்தியேக மருத்துவச் சிகிச்சைகளோ இதுவரை உலகில் கண்டுபிடிக்கப்படவில்லை என்பது குறிப்பிடத்தக்கது.
