ரிஷாட்டின் வழக்கிலிருந்து விலகினார் நீதியரசர் நவாஸ்!

பிரசுரிக்கப்பட்டது: 5 மணி நேரம் முன்

வில்பத்து வனப்பகுதிக்கருகில் அமைந்துள்ள பாதுகாக்கப்பட்ட காடுகளை அழித்து, அங்கு மக்களை மீள்குடியேற்றம் செய்வதற்கு எதிராகத் தொடரப்பட்ட ஒரு வழக்கில் வழங்கப்பட்ட தீர்ப்பை எதிர்த்து முன்னாள் அமைச்சர் ரிஷாத் பதியுதீன் தாக்கல் செய்த மேன்முறையீட்டை விசாரிப்பதிலிருந்து உயர்நீதிமன்ற நீதியரசர் ஏ.எச்.எம்.டி. நவாஸ் நேற்று விலகிக்கொண்டார்.

ரிஷாத் பதியுதீன் தாக்கல் செய்த இந்த மேன்முறையீடு, ஏ.எச்.எம்.டி. நவாஸ், சம்பத் அபேகோன் மற்றும் கிஹான் குலதுங்க ஆகியோர் அடங்கிய மூன்று நீதியரசர்கள் கொண்ட உயர்நீதிமன்ற அமர்வின் முன் நேற்று விசாரணைக்கு எடுத்துக்கொள்ளப்பட்டது.

அப்போது, தனிப்பட்ட காரணங்களுக்காக இந்த மனுவின் விசாரணையிலிருந்து விலகுவதாக உயர்நீதிமன்ற நீதியரசர் ஏ.எச்.எம்.டி. நவாஸ் தெரிவித்தார்.

அதன்படி, இந்த மேன்முறையீட்டு மனுவை செப்டெம்பர் 09ஆம் திகதி மற்றொரு அமர்வின் முன் விசாரணைக்கு அழைக்குமாறு அந்த அமர்வு உத்தரவிட்டது.

வில்பத்து வனப்பாதுகாப்பு மண்டலத்துக்கு அருகில் அமைந்துள்ள பாதுகாக்கப்பட்ட காடுகளை அழித்ததையும் அங்கு மக்களை மீள்குடியேற்றம் செய்ததையும் எதிர்த்து, சுற்றுச்சூழல் நீதி நிலையம் 2015ஆம் ஆண்டில் முன்னாள் அமைச்சர் ரிஷாத் பதியுதீன் மற்றும் பிறருக்கு எதிராக மேன்முறையீட்டு நீதிமன்றத்தில் ரீட் மனுவைத் தாக்கல் செய்திருந்தது.

மனுவை விசாரித்துத் தீர்ப்பளித்த மேன்முறையீட்டு நீதிமன்றம், சம்பந்தப்பட்ட பகுதியில் காடுகளை அழித்ததற்கு முன்னாள் அமைச்சரே பொறுப்பேற்க வேண்டும் என்றும், அதன்படி, காடுகளை மீண்டும் வளர்ப்பதற்கான செலவை அவர் வனப் பாதுகாப்புத் துறைக்குச் செலுத்த வேண்டும் என்றும் உத்தரவிட்டிருந்தது.

அதன்படி, காடுகளை மீண்டும் வளர்க்கும் பணிக்காக முன்னாள் அமைச்சர் சுமார் 108 கோடி ரூபா செலுத்த வேண்டும் என்று வனப் பாதுகாப்புத் துறை கணக்கிட்டிருந்தது.

மேன்முறையீட்டு நீதிமன்றத்தின் தீர்ப்பு சட்டத்துக்கு முரணானது என்றும், எனவே, அதை இரத்துசெய்ய உத்தரவு பிறப்பிக்கப்பட வேண்டும் என்றும் கோரி முன்னாள் அமைச்சர் ரிஷாத் பதியுதீன் உயர் நீதிமன்றத்தில் இந்த மேன்முறையீட்டைத் தாக்கல் செய்துள்ளார்.

உயர் நீதிமன்ற நீதியரசர்களான யசந்த கோதாகொட, மஹிந்த சமயவர்தன ஜனக் டி சில்வா மற்றும் அர்ஜுன ஒபேசேகர ஆகியோர் இந்த மனு மீதான விசாரணையிலிருந்து ஏற்கனவே தங்களை விலக்கிக் கொண்டுள்ளனர்.

சட்டத்தரணி டாக்டர் ரவீந்திரநாத் தாபரே உள்ளிட்ட சட்டத்தரணிகள் குழுவொன்று சுற்றுச்சூழல் நீதி நிலையத்தின் சார்பில் ஆஜரானது.