ஜெருசலேமில் பிரான்ஸ் நாட்டு கன்னியாஸ்திரி மீது தாக்குதல்: உலகளாவிய கண்டனம்

பிரசுரிக்கப்பட்டது: 15 மணி நேரம் முன்

ஜெருசலேமில் பிரான்ஸ் நாட்டைச் சேர்ந்த கத்தோலிக்க கன்னியாஸ்திரி மற்றும் தொல்பொருள் ஆராய்ச்சியாளர் ஒருவர் மீது நடத்தப்பட்ட தாக்குதல் தொடர்பான வீடியோ சமூக வலைத்தளங்களில் வெளியாகி பெரும் அதிர்ச்சியை ஏற்படுத்தியுள்ளது. இஸ்ரேலிய வெளியுறவு அமைச்சகம் இதனை ஒரு "வெட்கக்கேடான செயல்" என்று கண்டித்துள்ளது.

சம்பவம் என்ன? வெளியாகியுள்ள வீடியோவில், வீதியில் நடந்து செல்லும் கன்னியாஸ்திரிக்கு பின்னால் ஓடிவரும் ஒரு நபர், அவரை மிக வன்முறையாகத் தள்ளிவிடுகிறார். இதில் அவர் வீதியில் இருந்த கல்லொன்றில் மோதி தலையில் காயமேற்படும் நிலைக்குத் தள்ளப்படுகிறார்.

தாக்குதல் நடத்தியவர் பின்னர் மீண்டும் வந்து தரையில் விழுந்து கிடக்கும் கன்னியாஸ்திரியை எட்டி உதைக்கிறார். அங்கிருந்த வழிப்போக்கர் ஒருவர் தலையிட்ட பின்னரே அவர் அங்கிருந்து விலகிச் செல்கிறார்.

தாக்குதல் நடத்தியவர் யூத இனத்தைச் சேர்ந்தவர் எனத் தெரியவருகிறது. 36 வயதுடைய ஒருவரை இஸ்ரேலிய பொலிஸார் கைது செய்துள்ளனர்.

"ஜெருசலேமில் அனைத்து இன மற்றும் மதத்தினரின் பாதுகாப்பைப் பேணுவதற்கு எவ்வித சகிப்புத்தன்மையும் இன்றி கடுமையான நடவடிக்கை எடுக்கப்படும்" என பொலிஸார் தெரிவித்துள்ளனர்.

இடம் மற்றும் பின்னணி: இந்தத் தாக்குதல் சீயோன் மலையில் (Mount Zion) இடம்பெற்றுள்ளது.

இது யூதர்களுக்கு மன்னர் தாவீதின் கல்லறை அமைந்த இடமாகவும், கிறிஸ்தவர்களுக்கு இயேசுவின் இறுதி இராப்போஜனம் (Last Supper) நடைபெற்ற இடமாகவும் போற்றப்படும் புனிதப் பகுதியாகும்.

இஸ்ரேலில் உள்ள மத சுதந்திர தரவு மையம் (Religious Freedom Data Centre - RFDC) என்ற தொண்டு நிறுவனம், கிறிஸ்தவர்களுக்கு எதிரான துன்புறுத்தல்கள் குறித்துப் பின்வரும் தரவுகளை வெளியிட்டுள்ளது:

2026 ஆம் ஆண்டின் முதல் மூன்று மாதங்களில் மாத்திரம் கிறிஸ்தவர்களுக்கு எதிரான 31 துன்புறுத்தல் சம்பவங்கள் பதிவாகியுள்ளன.

இதில் பெரும்பாலும் காறி உமிழ்தல் (Spitting) அல்லது தேவாலயச் சொத்துக்களைச் சேதப்படுத்துதல் போன்ற சம்பவங்களே அதிகளவில் இடம்பெறுகின்றன.

பல சம்பவங்கள் அதிகாரப்பூர்வமாகப் பதிவாவதில்லை என RFDC கூறுகிறது. உதாரணமாக, மே ஆ ஷெரிம் (Mea Shearim) பகுதியிலுள்ள மடாலயம் ஒன்று தெரிவிக்கையில், "பிள்ளைகள் எமது ஆண்டவர் இயேசுவின் பெயரைச் சொல்லிச் சபிக்கிறார்கள் மற்றும் காறி உமிழ்கிறார்கள்; இது எத்தனை முறை நடந்தது என்று எம்மால் எண்ண முடியாது" என்று குறிப்பிட்டுள்ளது.