இலஞ்ச ஊழல் ஆணைக்குழுவில் முன்னிலையானார் மஹிந்த

பிரசுரிக்கப்பட்டது: 4 மணி நேரம் முன்

முன்னாள் ஜனாதிபதி மஹிந்த ராஜபக்ஷ இன்று (12) காலை லஞ்ச அல்லது ஊழல் குற்றச்சாட்டுகளை விசாரணை செய்யும் ஆணைக்குழுவில் முன்னிலையாகவுள்ளார்.

2013ஆம் ஆண்டு ஸ்ரீலங்கன் ஏர்லைன்ஸ் நிறுவனத்திற்காக விமானங்களைக் கொள்வனவு செய்தபோது, 2 மில்லியன் அமெரிக்க டாலர்கள் இலஞ்சமாகப் பெறப்பட்டதாகக் கூறப்படும் சம்பவம் தொடர்பாக வாக்குமூலம் அளிக்குமாறு ஆணைக்குழு விடுத்த அறிவித்தலுக்கு அமைய அவர் அங்கு செல்லவுள்ளார்.

இதேவேளை, முன்னாள் விமான போக்குவரத்து அமைச்சர் பிரியங்கர ஜயரத்னவையும் ஆணைக்குழுவில் முன்னிலையாகுமாறு அறிவிக்கப்பட்டுள்ளதாகத் தெரிவிக்கப்படுகிறது.

சட்டத்தரணியின் விளக்கம்:

முன்னாள் ஜனாதிபதியின் ஊடகப் பேச்சாளர் சட்டத்தரணி மனோஜ் கமகே இது குறித்துத் தெரிவிக்கையில், இன்று காலை 9 மணியளவில் மஹிந்த ராஜபக்ஷ ஆணைக்குழுவில் முன்னிலையாகவுள்ளதாகக் குறிப்பிட்டார்.

எவ்வாறாயினும், சில சட்ட விடயங்கள் குறித்து சட்டத்தரணிகள் குழுவுடன் கலந்துரையாடல்கள் நடத்தப்படவுள்ளதாகவும் அவர் தெரிவித்தார்.

வாக்குமூலம் குறித்த சர்ச்சை:

ஸ்ரீலங்கன் ஏர்லைன்ஸ் நிறுவனத்தின் முன்னாள் தலைமை நிர்வாக அதிகாரி (மறைந்த) கபில சந்திரசேன வழங்கிய வாக்குமூலத்தின் அடிப்படையிலேயே முன்னாள் ஜனாதிபதிக்கு இந்த அழைப்பு விடுக்கப்பட்டுள்ளது.

எனினும், அந்த வாக்குமூலமானது அச்சுறுத்தி, வலுக்கட்டாயமாகப் பெறப்பட்டது என கபில சந்திரசேன நீதிமன்றத்தில் சத்தியக்கடதாசி தாக்கல் செய்துள்ளதாக சட்டத்தரணி மனோஜ் கமகே சுட்டிக்காட்டினார்.

அந்த வாக்குமூலத்தை அடிப்படையாகக் கொண்டு இந்த அழைப்பை விடுப்பது சட்டவிரோதமானது எனவும் அவர் வாதிட்டார்.

கைது செய்யும் நிலைப்பாடு:

முன்னாள் ஜனாதிபதியை இன்றைய தினம் கைது செய்ய வேண்டிய அவசியம் இல்லை என்று லஞ்ச ஊழல் ஆணைக்குழுவின் சிரேஷ்ட அதிகாரி ஒருவர் தெரிவித்துள்ளார்.