மக்களை சிக்கனமாக இருக்குமாறு மோடி வேண்டுகோள்
மத்திய கிழக்கில் ஏற்பட்டுள்ள போர்ச் சூழலால் ஏற்படக்கூடிய பொருளாதார பாதிப்புகளில் இருந்து தேசத்தைப் பாதுகாப்பதற்காக, இந்திய பிரதமர் நரேந்திர மோடி நாட்டு மக்களிடம் சில முக்கிய கோரிக்கைகளை முன்வைத்துள்ளதாக இந்திய ஊடகங்கள் செய்தி வெளியிட்டுள்ளன.
பிரதமர் மோடி முன்வைத்துள்ள பிரதான கோரிக்கைகள் பின்வருமாறு:
எரிபொருள் மற்றும் உரப் பயன்பாட்டைக் குறைத்தல்.
வெளிநாட்டுப் பயணங்களைக் கட்டுப்படுத்துதல்.
வீட்டிலிருந்தே வேலை செய்தல் (Work from Home).
தங்கம் வாங்குவதைக் குறைத்தல்.
பெட்ரோல், டீசல் மற்றும் உரங்களுக்காகச் செலவிடப்படும் பணத்தைச் சேமிக்குமாறு இந்திய மக்களிடம் மோடி கேட்டுக்கொண்டுள்ளார். அத்துடன், நாட்டிலிருந்து அந்நியச் செலாவணி வெளியேறுவதைத் தடுக்க வெளிநாட்டுப் பயணங்களைக் குறைக்குமாறும், வெளிநாடுகளில் திருமணங்களை நடத்துவதை நிறுத்திவிட்டு நாட்டிற்குள்ளேயே சுற்றுலாக்களை மேற்கொள்ளுமாறும் அவர் வலியுறுத்தியுள்ளார்.
அத்தியாவசியமற்ற பயணங்களைத் தவிர்த்து எரிபொருளைச் சிக்கனமாகப் பயன்படுத்துமாறும், பெட்ரோல் மற்றும் டீசல் பயன்பாட்டைக் குறைக்க ரயில்வே, மின்சார வாகனங்கள் அல்லது பொதுப் போக்குவரத்தைப் பயன்படுத்துமாறும் அவர் அறிவுறுத்தியுள்ளார்.
சக்தி மற்றும் வேலைவாய்ப்பு: டீசலுக்குப் பதிலாக சூரிய சக்தியைப் பயன்படுத்துமாறும், குறிப்பாக சூரிய சக்தியால் இயங்கும் நீர் இறைக்கும் இயந்திரங்களை (Solar Water Pumps) பயன்படுத்துமாறும் மோடி ஆலோசனை வழங்கியுள்ளார். அத்துடன், சாத்தியமான போதெல்லாம் வீட்டிலிருந்தே வேலை செய்யும் முறையைப் பின்பற்றுமாறு அவர் கோரிக்கை விடுத்துள்ளார்.
அந்நியச் செலாவணி சேமிப்பு: அந்நியச் செலாவணியைச் சேமிப்பதற்காக ஒரு வருடத்திற்குத் தங்கம் வாங்குவதைக் கட்டுப்படுத்துமாறும், அத்தியாவசியமற்ற தங்க ஆபரணங்களைக் கொள்வனவு செய்வதைத் தவிர்க்குமாறும் அவர் கேட்டுக் கொண்டுள்ளார்.
மத்திய கிழக்கு போர் காரணமாக நாளுக்கு நாள் உயர்ந்து வரும் எண்ணெய் விலையுடன் நாட்டின் பொருளாதாரத்தை வலுப்படுத்துவதற்காகவே இந்த நடவடிக்கைகள் எடுக்கப்படுவதாக மோடி தெரிவித்துள்ளார். இந்திய ரூபாயை வலுப்படுத்துவதும், இறக்குமதிச் செலவுகளைக் குறைப்பதன் மூலம் ரூபாயின் மதிப்பு வீழ்ச்சியடைவதைக் கட்டுப்படுத்துவதுமே இந்த நடவடிக்கைகளின் முக்கிய நோக்கமாகும் என இந்தியப் பிரதமர் நரேந்திர மோடி மேலும் குறிப்பிட்டுள்ளார்.
