உயிர்த்த ஞாயிறு சதிவலையிலிருந்து தப்ப கோட்டாபய தொடுத்த ரிட் மனு ஒத்திவைப்பு!
"மூன்று ஆணைக்குழுக்களின் அறிக்கைகளிலோ அல்லது உயர்நீதிமன்றத் தீர்ப்பிலோ கோட்டாவின் பெயர் இல்லை" - ஜனாதிபதி சட்டத்தரணியின் நீண்டவாதம் சுவிற்சர்லாந்திற்குத் தப்பியோடிய அசாத் மௌலானாவின் ஆவணங்களை நீதிமன்றத்தில் சமர்ப்பித்தமை குறித்து சட்டமா அதிபர் மீது 'நேர்மையற்ற' குற்றச்சாட்டு! கொழும்பு கோட்டை நீதிமன்றத்தினால் பயணத்தடையும் விதிப்பு - பயங்கரவாதத் தடைச்சட்டத்தை (PTA) பயன்படுத்தி சிறையிலடைக்க முயற்சிப்பதாக பாதுகாப்பு அச்சம் வெளியீடு
உயிர்த்த ஞாயிறு பயங்கரவாதத் தாக்குதல் சம்பவம் தொடர்பில் தற்போது முன்னெடுக்கப்பட்டு வரும் குற்றவியல் விசாரணைகளுக்கு அமைவாக, தம்மை கைது செய்வதைத் தடுக்கும் வகையிலான ரிட் கட்டளையொன்றைப் பிறப்பிக்குமாறு கோரி முன்னாள் ஜனாதிபதி கோட்டாபய ராஜபக்ஷவினால் தாக்கல் செய்யப்பட்ட மனு இன்று (24) இரண்டாவது நாளாகவும் மேன்முறையீட்டு நீதிமன்றத்தினால் பரிசீலிக்கப்பட்டது. இதன்போது, மேலதிக சமர்ப்பணங்களை எதிர்வரும் ஜூலை மாதம் 06 மற்றும் 09 ஆம் திகதிகளுக்கு ஒத்திவைக்க நீதிமன்றம் உத்தரவிட்டுள்ளது.
மேன்முறையீட்டு நீதிமன்றத்தின் தலைவர் நீதியரசர் ரொஹான்த அபேசூரிய மற்றும் சரத் திஸாநாயக்க ஆகியோரடங்கிய நீதியரசர்கள் ஆயத்தின் முன்னிலையில் இன்று இந்த விசாரணை எடுத்துக்கொள்ளப்பட்டது. இதன்போது கோட்டாபய ராஜபக்ஷ சார்பில் முன்னிலையான ஜனாதிபதி சட்டத்தரணி ரொமேஷ் டி சில்வா, தற்போதைய விசாரணைகளின் சட்டபூர்வ தன்மையை கடுமையாக விமர்சித்தார்.
புதிய அரசாங்கத்தின் கீழ் உயிர்த்த ஞாயிறு தாக்குதல் விசாரணைகள் மீண்டும் வேகமெடுத்துள்ள பின்னணியில், முன்னாள் நாட்டுத் தலைவரும் ஆயுதப்படைகளின் தளபதியுமான கோட்டாபய ராஜபக்ஷ, பயங்கரவாதத் தடைச்சட்டத்தின் (PTA) கீழ் எந்த நேரத்திலும் கைது செய்யப்படக்கூடிய அபாயம் உள்ளமை இந்த வழக்கு விசாரணையின் ஊடாக உறுதியாகியுள்ளது.
ஏற்கனவே கொழும்பு கோட்டை நீதவான் நீதிமன்றத்தின் ஊடாக அவருக்கு எதிராக வெளிநாட்டுப் பயணத்தடை விதிக்கப்பட்டுள்ளதுடன், பிணையற்ற வகையில் விளக்கமறியலில் வைப்பதற்கான "அரசியல் பழிவாங்கல்" முயற்சியே இதுவென விவாதத் தரப்பின் பிரதான வாதமாக முன்வைக்கப்பட்டது.
நீதிமன்றத்தில் வெளிப்படுத்தப்பட்ட முக்கிய சட்ட அம்சங்கள்:
உத்தியோகபூர்வ அறிக்கைகளில் கோட்டாவின் பெயர் இல்லை: உயிர்த்த ஞாயிறு தாக்குதல் குறித்து விசாரணை நடத்திய உயர்நீதிமன்ற நீதியரசர் ஜனக் டி சில்வா தலைமையிலான ஜனாதிபதி ஆணைக்குழு, ஜயகீ த அல்விஸ் ஆணைக்குழு, நாடாளுமன்றத் தெரிவுக்குழு ஆகியவற்றின் அறிக்கைகளிலோ அல்லது பாதிக்கப்பட்டவர்களுக்கு இழப்பீடு வழங்க உத்தரவிட்ட ஏழு பேர் கொண்ட உயர்நீதிமன்ற நீதியரசர்கள் ஆயத்தின் தீர்ப்பிலோ கோட்டாபய ராஜபக்ஷவின் பெயரோ அல்லது அவரது பொறுப்புக்கூறல் குறித்தோ எவ்வித குறிப்புகளும் இல்லை என ரொமேஷ் டி சில்வா சுட்டிக்காட்டினார்.
அசாத் மௌலானாவின் சாட்சியமும் செனல் 4 விவகாரமும்: அரசியல் புகலிடம் கோரி சுவிற்சர்லாந்திற்குத் தப்பியோடியுள்ள அசாத் மௌலானா என்பவர், பிரித்தானியாவின் 'செனல் 4' ஊடகத்திற்கு இலங்கையின் நீதித்துறை ஊழல் நிறைந்தது எனக் கூறி வெளியிட்ட கருத்துக்களையும், பிள்ளையானுடன் அரசியல் கூட்டங்களில் எடுக்கப்பட்ட சாதாரண புகைப்படங்களையும் சட்டமா அதிபர் திணைக்களம் நேர்மையற்ற உள்நோக்கத்துடன் நீதிமன்றத்தில் சமர்ப்பித்துள்ளதாக குற்றம் சுமத்தப்பட்டது.
சி.ஐ.டி பிரதானிகளை இலக்கு வைத்தல்: 2017 ஆம் ஆண்டு முதல் சஹ்ரான் பற்றிய உளவுத்துறை தகவல்கள் கிடைத்திருந்தும் நடவடிக்கை எடுக்கத் தவறிய, அன்றைய சி.ஐ.டி பணிப்பாளர் ஷானி அபேசேகர மற்றும் பிரதிப் பொலிஸ் மா அதிபர் ரவி செனவிரத்ன ஆகியோரின் அலட்சியப் போக்கு குறித்து குற்றவியல் சட்டத்தின் கீழ் வழக்குத் தொடருமாறு ஜயகீ த அல்விஸ் ஆணைக்குழு பரிந்துரைத்துள்ளது.
அவ்வாறான பின்னணியில், தற்போது அவர்களின் கீழ் விசாரணைகளை வழிநடத்தி முன்னாள் ஜனாதிபதியை சிக்க வைக்க முயற்சிப்பது கேள்விக்குரியது என விவாதத் தரப்பு தெரிவித்தது. (இதன்போது, சட்டமா அதிபர் திணைக்களம் சி.ஐ.டி.யின் கைபொம்மையாக மாறியுள்ளதாக முன்வைக்கப்பட்ட கருத்திற்கு பிரதி சொலிசிட்டர் ஜெனரல் சுஹர்ஷி ஹேரத் கடும் எதிர்ப்பை வெளியிட்டார்).
சட்ட நிபுணர்களின் கருத்து: இந்த ரிட் மனுவானது வெறும் தனிநபர் சுதந்திரத்தைப் பாதுகாப்பதற்கும் அப்பாற்பட்டு, எதிர்காலத்தில் மேற்கொள்ளப்படவுள்ள அரசியல் மற்றும் பாதுகாப்பு சார்ந்த தீர்மானங்களின் ஆரம்ப அறிகுறியாகும் என சட்ட வல்லுநர்கள் சுட்டிக்காட்டுகின்றனர்.
அமெரிக்காவின் எஃப்.பி.ஐ (FBI) அமைப்பின் 33 அதிகாரிகள் வருகை தந்து நடத்திய விசாரணைகளில் கூட கண்டறியப்படாத விடயங்களை, அரசியல் புகலிடம் கோரும் தனிநபர்களின் வாக்குமூலங்களை அடிப்படையாகக் கொண்டு நிரூபிக்க முயல்வது சட்ட ரீதியாக பெரும் சவாலாகும்.
எவ்வாறாயினும், ஒருவரை விளக்கமறியலில் வைப்பது தண்டனையாக அமையக்கூடாது என விவாதத் தரப்பு வாதிட்ட போதிலும், உயிர்த்த ஞாயிறு தாக்குதலின் பின்னணியில் உள்ள சூத்திரதாரிகளைக் கண்டறிய வேண்டும் என்ற மக்கள் மற்றும் அரசியல் அழுத்தங்களுக்கு மத்தியில், மேன்முறையீட்டு நீதிமன்றம் ஜூலை 06 ஆம் திகதி வழங்கவுள்ள தீர்மானம் நாட்டின் அரசியல் அரங்கில் அடுத்த பாரிய திருப்புமுனையாக அமையும் என எதிர்பார்க்கப்படுகிறது.
