டொரொண்டோ இடைத்தேர்தலுக்கான வேட்பாளர் தேர்வை ஜூலை 18-ல் நடத்தும் லிபரல் கட்சி!
கனடாவின் ஆளும் லிபரல் கட்சி, டொரொண்டோவின் Beaches–East York தொகுதியில் நடைபெறவுள்ள கூட்டாட்சி இடைத்தேர்தலுக்கான தனது வேட்பாளரைத் தேர்ந்தெடுக்கும் உள்கட்சி நியமனத் தேர்தலை ஜூலை 18, 2026 அன்று நடத்தவுள்ளதாக அறிவித்துள்ளது.
இந்தத் தொகுதியின் நீண்டகால நாடாளுமன்ற உறுப்பினராக இருந்த நேட் எர்ஸ்கைன்-ஸ்மித் (Nate Erskine-Smith) அண்மையில் தனது பதவியை இராஜினாமா செய்ததையடுத்து, அந்த இடம் காலியாகியுள்ளது. இந்தத் தொகுதி பாரம்பரியமாக லிபரல் கட்சியின் வலுவான ஆதரவு தொகுதியாகக் கருதப்படுகிறது.
எனினும், பிரதமர் மார்க் கார்னி இதுவரை இந்தத் தொகுதிக்கான இடைத்தேர்தல் தேதியை அதிகாரப்பூர்வமாக அறிவிக்கவில்லை. அடுத்த சில மாதங்களில் அனைத்து முக்கிய அரசியல் கட்சிகளையும் சேர்ந்த பல நாடாளுமன்ற உறுப்பினர்கள் பதவி விலக உள்ளதால், கனடாவின் பல தொகுதிகளில் இடைத்தேர்தல்கள் நடைபெறும் என எதிர்பார்க்கப்படுகிறது.
இதற்கிடையில், முன்னாள் மத்திய அமைச்சரான ஜோனதன் வில்கின்சன் (Jonathan Wilkinson) கனடாவின் ஐரோப்பிய ஒன்றியத்திற்கான தூதராக நியமிக்கப்பட்டதைத் தொடர்ந்து நாடாளுமன்ற உறுப்பினர் பதவியை ராஜினாமா செய்துள்ளார்.
அதேபோல், கியூபெக் மாகாணத்தைச் சேர்ந்த கன்சர்வேட்டிவ் கட்சி நாடாளுமன்ற உறுப்பினர் ரிச்சர்ட் மார்டெல் (Richard Martel) செனட் உறுப்பினராக நியமிக்கப்பட்டதையடுத்து தனது பதவியை விலகியுள்ளார்.
மேலும், பிளாக் கியூபெக்வா (Bloc Québécois) கட்சியைச் சேர்ந்த முன்னாள் எம்.பி. சிமோன்-பியர் சவர்ட்-ட்ரெம்ப்லே (Simon-Pierre Savard-Tremblay) மாகாணத் தேர்தலில் போட்டியிடுவதற்காக கடந்த ஜூன் மாதம் நாடாளுமன்ற உறுப்பினர் பதவியை ராஜினாமா செய்தார்.
