ஒட்டாவாவில் உள்ள மூடப்பட்ட ஈரான் தூதரகத்துக்குள் நுழைந்தவர் கைது!
ஈரானின் மூடப்பட்ட தூதரகத்திற்குள் அத்துமீறி நுழைந்ததற்காக ஒருவர் கைது செய்யப்பட்டதாக ஒட்டாவா காவல்துறையினர் தெரிவித்துள்ளனர்.
திங்கள்கிழமை அதிகாலை 5:50 மணியளவில் தூதரகத்தின் வேலியை ஒருவர் தாண்டியதாக வந்த தகவலையடுத்து காவல்துறையினர் அங்கு சென்றனர். 2012-இல் கனடா-ஈரான் தூதரக உறவுகள் துண்டிக்கப்பட்ட பிறகு இந்த கட்டிடம் காலியாக உள்ளது.
சமூக ஊடகங்களில் பரவும் ஒரு காணொளியில், போராட்டக்காரர் ஒருவர் இஸ்லாமிய குடியரசின் அதிகாரப்பூர்வ இலச்சினையை அகற்றிவிட்டு, அதற்குப் பதிலாக 1979 புரட்சிக்கு முந்தைய சிங்கமும் சூரியனும் கொண்ட கொடியை ஏற்றுவதைக் காண முடிகிறது. இது குறித்து காவல்துறையினர் விசாரணை நடத்தி வருகின்றனர்.
ஈரானில் தற்போது நிலவி வரும் கடுமையான போராட்டங்களுக்கு மத்தியில் இந்த சம்பவம் நடந்துள்ளது. வாழ்க்கைச் செலவு உயர்வு மற்றும் எரிபொருள் தட்டுப்பாடு காரணமாக டிசம்பர் 28 அன்று தொடங்கிய இந்தப் போராட்டங்கள், தற்போது உச்ச தலைவர் அலி கமேனியின் பதவி விலகலைக் கோரும் நிலைக்குத் தீவிரமடைந்துள்ளன.
ஈரானில் நடந்து வரும் ஒடுக்குமுறையில் இதுவரை 2,000-க்கும் மேற்பட்ட போராட்டக்காரர்கள் கொல்லப்பட்டிருக்கலாம் என்று மனித உரிமை அமைப்புகள் தெரிவிக்கின்றன. நிலைமை மோசமடைந்து வருவதால், ஈரானில் உள்ள கனடியர்கள் உடனடியாக அந்நாட்டை விட்டு வெளியேறுமாறு கனடா அரசு (Global Affairs Canada) செவ்வாய்க்கிழமை எச்சரிக்கை விடுத்துள்ளது.
