ஹைட்ரஜன் கசிவு; ஆர்டெமிஸ் II விண்கல ஏவுதல் மார்ச் வரை தாமதம்!

சந்திரனைச் சுற்றி வரும் வரலாற்றுச் சிறப்புமிக்க ஆர்டெமிஸ் II (Artemis II) விண்கலத்தை விண்ணுக்கு அனுப்பும் திட்டத்தை நாசா ஒத்திவைத்துள்ளது.

விண்கலத்தை ஏவுவதற்கு முன்னதாக மேற்கொள்ளப்பட்ட "Wet dress rehearsal" எனப்படும் ஒத்திகையின் போது, திரவ ஹைட்ரஜன் கசிவு கண்டறியப்பட்டதே இதற்கு முக்கிய காரணமாகும்.

முதலில் பெப்ரவரி 8-ம் திகதி இந்த விண்கலத்தை ஏவத் திட்டமிடப்பட்டிருந்தது. ஆனால் தற்போது மார்ச் மாதமே இதற்குரிய அடுத்த வாய்ப்பு (Launch window) கிட்டும் என நாசா அறிவித்துள்ளது.

ஒத்திகையின் போது நேர்ந்த சிக்கல்கள்:

ஹைட்ரஜன் கசிவு: திங்கட்கிழமை மதிய வேளையில் ரொக்கெட்டுக்குள் பல மில்லியன் லீற்றர் ஹைட்ரஜனை நிரப்பும் போது இந்தக் கசிவு அவதானிக்கப்பட்டது. பொறியியலாளர்கள் பல மணிநேரம் போராடியும் அதனைச் சரிசெய்ய முடியாமல் போனதால் ஒத்திகை நிறுத்தப்பட்டது.

தொழில்நுட்பக் கோளாறுகள்:

கசிவு தவிர, விண்கலத்தின் வால்வு (Valve) ஒன்றிலும் கோளாறு ஏற்பட்டதுடன், தரைக்கட்டுப்பாட்டு நிலையத்துடனான தொடர்புகளும் அவ்வப்போது துண்டிக்கப்பட்டன.

சவாலான போக்குவரத்து:

ரொக்கெட்டை ஏவுதளத்திலிருந்து மீளவும் தொழிற்சாலைக்குக் கொண்டு செல்வது மிகக் கடினமான காரியம். கடந்த ஜனவரியில் இதனை ஏவுதளத்திற்கு நகர்த்துவதற்கே 12 மணிநேரம் எடுத்தது. எனவே, ஏவுதளத்திலேயே வைத்து பழுதுபார்க்க முடியுமா என நாசா ஆராய்ந்து வருகிறது.

விண்வெளி வீரர்களின் நிலை:

கனடிய விண்வெளி ஆய்வு மையத்தைச் சேர்ந்த ஜெரமி ஹேன்சன் (Jeremy Hansen) உட்பட நான்கு விண்வெளி வீரர்கள் இதற்காகத் தனிமைப்படுத்தப்பட்டிருந்தனர் (Quarantine).

ஏவுதல் தள்ளிப்போடப்பட்டதையடுத்து, அவர்கள் இன்று காலை தனிமைப்படுத்தலில் இருந்து விடுவிக்கப்பட்டுள்ளனர். அடுத்த ஏவுதலுக்கு இரண்டு வாரங்களுக்கு முன்னதாக அவர்கள் மீண்டும் தனிமைப்படுத்தப்படுவார்கள்.

ஆர்டெமிஸ் II திட்டத்தின் நோக்கம்:

இது 1972-க்குப் பின்னர் மனிதர்களைச் சந்திரனுக்கு அனுப்பும் நாசாவின் பாரிய திட்டத்தின் இரண்டாம் கட்டமாகும். 10 நாட்கள் நீடிக்கும் இந்தப் பயணத்தில் வீரர்கள் நிலவில் தரையிறங்க மாட்டார்கள்.

மாறாக, சந்திரனைச் சுற்றி வந்து விண்கலத்தின் பாதுகாப்பு மற்றும் உயிர்வாழத் தேவையான கட்டமைப்புக்களைச் சோதிப்பார்கள். இதன் வெற்றியே ஆர்டெமிஸ் III ஊடாக மனிதர்களை நிலவில் தரையிறக்க வழிவகுக்கும்.