'அரகலய' போராட்டத்தின் போதான கொலை' துன்புறுத்தல்கள்: 12 பேருக்கு மரண தண்டனை!

கடந்த 2022ஆம் ஆண்டு நாட்டில் ஏற்பட்ட 'அரகலய' போராட்டக் காலப்பகுதியில், பொலன்னறுவை மாவட்ட முன்னாள் நாடாளுமன்ற உறுப்பினர் அமரகீர்த்தி அத்துக்கோரள மற்றும் அவரது பாதுகாப்பு உத்தியோகத்தர் ஆகியோர் அடித்துக் கொலை செய்யப்பட்ட சம்பவம் தொடர்பில் குற்றவாளிகளாகக் காணப்பட்ட 12 பேருக்கு கம்பஹா மேல் நீதிமன்றம் இன்று (11) மரண தண்டனை விதித்துத் தீர்ப்பளித்துள்ளது.

கம்பஹா மேல் நீதிமன்றின் மூவர் அடங்கிய விசேட நீதாய மேல் நீதிமன்றத்தினால் இந்த வரலாற்று முக்கியத்துவம் வாய்ந்த தீர்ப்பு அறிவிக்கப்பட்டது.

இந்த இரட்டைக்கொலைச் சம்பவம் தொடர்பில் 41 பிரதிவாதிகளுக்கு எதிராக சட்டமா அதிபரினால் வழக்குத் தாக்கல் செய்யப்பட்டிருந்தது. நீண்ட விசாரணைக்கு பின்னர் இன்று வழங்கப்பட்ட தீர்ப்பின் முக்கிய அம்சங்கள் பின்வருமாறு:

12 பிரதிவாதிகளுக்கு மரண தண்டனை விதிக்கப்பட்டது. (மரண தண்டனை விதிக்கப்பட்டவர்களில் ஒருவர் தற்போது நீதிமன்றத்தைப் புறக்கணித்து தலைமறைவாகியுள்ளார்).

4 பிரதிவாதிகளுக்கு 6 மாத கால சிறைத்தண்டனை விதிக்கப்பட்டு, அது 5 ஆண்டுகளுக்கு ஒத்திவைக்கப்பட்டுள்ளது. போதிய சாட்சியங்கள் இல்லாத காரணத்தினால் ஏனைய 23 பிரதிவாதிகளையும் வழக்கில் இருந்து விடுவித்து நீதிமன்றம் உத்தரவிட்டது.

இந்த வழக்கின் தீர்ப்பானது நீதிபதிகள் குழாமிடையே ஒருமித்த கருத்தாக அமையாது, பிளவுபட்ட தீர்ப்பாக (Split Verdict) அமைந்திருந்தமை குறிப்பிடத்தக்கது.

நீதிமன்றின் தீர்ப்பின்படி, நீதாய மேல் நீதிமன்றின் தலைமை நீதிபதி சஹான் மாப்பா பண்டார அனைத்து பிரதிவாதிகளையும் விடுவிக்கத் தீர்மானித்திருந்தார்.

எனினும், ஏனைய இரு நீதிபதிகளான ரஷ்மி சிங்கப்புலி மற்றும் ரசாந்த கொடவெல ஆகியோர் 12 பிரதிவாதிகளுக்கு மரண தண்டனை வழங்கப்பட வேண்டும் எனத் தீர்ப்பளித்தனர். அதற்கமைய, பெரும்பான்மை நீதிபதிகளின் முடிவின் அடிப்படையில் இந்தத் தீர்ப்பு அறிவிக்கப்பட்டது.

கடந்த 2022 மே 09ஆம் திகதி அலரி மாளிகையில் நடைபெற்ற கூட்டத்தில் கலந்துகொண்டு மீண்டும் பொலன்னறுவை நோக்கித் திரும்பிக்கொண்டிருந்த போதே, நிட்டம்புவ நகரில் வைத்து ஆர்ப்பாட்டக்காரர்களினால் நாடாளுமன்ற உறுப்பினர் அமරකீர்த்தி அத்துக்கோரள மற்றும் பொலிஸ் சார்ஜன்ட் ஜயந்த குணவர்தன ஆகியோர் மிலேச்சத்தனமாகத் தாக்கிப் படுகொலை செய்யப்பட்டனர்.

இந்தச் சம்பவம் தொடர்பான சிசிடிவி (CCTV) காணொளிகள் மற்றும் குற்றப்புலனாய்வுத் திணைக்களத்தின் (CID) விசாரணைகளை அடிப்படையாகக் கொண்டு சட்ட மா அதிபரினால் 14 குற்றச்சாட்டுகளின் கீழ் வழக்குத் தாக்கல் செய்யப்பட்டிருந்தது.

இந்த வழக்கானது 2023ஆம் ஆண்டு முதல் சுமார் இரண்டரை வருடங்களாகத் தொடர்ச்சியாக விசாரணைக்கு எடுத்துக் கொள்ளப்பட்டு வந்த நிலையில், இன்றைய தினம் இறுதித் தீர்ப்பு வழங்கப்பட்டுள்ளமை குறிப்பிடத்தக்கது.