கனடாவிலிருந்து அமெரிக்கப் பயணம் மேற்கொள்வோர் கவனத்திற்கு!

அண்மைய மாதங்களாக கனடாவிலிருந்து அமெரிக்கா நோக்கிப் பயணம் செய்யும் கனடியர்களுக்கு எல்லைப் பகுதிகளில் கடும் சோதனைகளும், பதற்றமான சூழலும் நிலவி வருகின்றது. குறிப்பாக, பயணிகளின் அலைபேசிகளைச் சோதனையிடுதல், சமூக ஊடகக் கணக்கு விபரங்களைக் கோருதல் மற்றும் எல்லைச் சட்டங்களில் நிலவும் குழப்பங்கள் காரணமாகப் பயணிகள் கடும் அசௌகரியங்களை எதிர்நோக்கி வருகின்றனர்.

இவ்வாறானதொரு பின்னணியில், வேலை நிமித்தமாக அமெரிக்கா செல்வோருக்கு ஏற்படக்கூடிய சிக்கல்கள் குறித்து குடிவரவு சட்ட நிபுணர்கள் முக்கிய ஆலோசனைகளை வழங்கியுள்ளனர்.

முறையான ஆவணங்களின் அவசியம்

டொரண்டோவைச் சேர்ந்த குடிவரவு சட்டத்தரணி செனியா செர்ன் மெக்கலம் (Ksenia Tchern McCallum) இது குறித்துக் கருத்துத் தெரிவிக்கையில், "நீங்கள் ஒரு கூட்டத்திற்காகவோ அல்லது ஒரு வாடிக்கையாளரைச் சந்திப்பதற்காகவோ அமெரிக்கா சென்றால், அங்கு நீங்கள் 'வேலை செய்யப் போவதாக' (Working in the U.S.) ஒருபோதும் கூறக்கூடாது" என எச்சரித்துள்ளார்.

நீங்கள் கனடிய நிறுவனத்திற்காகவே பணியாற்றுகின்றீர்கள் என்பதையும், உங்கள் பயணம் குறுகிய காலமானது என்பதையும் உறுதிப்படுத்த பின்வரும் ஆவணங்களைக் கைவசம் வைத்திருக்குமாறு அவர் பரிந்துரைக்கின்றார்:

உத்தியோகபூர்வ வேலை நியமனக் கடிதம் (Letter of Employment).

சம்பள விபரப் பட்டியல் (Pay stubs).

தங்குமிட விபரங்கள் மற்றும் பயணச் சீட்டுகள்.

கவனிக்க வேண்டிய முக்கிய விடயங்கள்

அமெரிக்க எல்லைப் பாதுகாப்பு அதிகாரிகளின் மேலதிக விசாரணைகளைத் தவிர்க்கப் பயணிகள் பின்வரும் விடயங்களில் அவதானமாக இருக்க வேண்டும்:

கனடாவுடனான தொடர்பு: நீங்கள் மீண்டும் கனடாவுக்குத் திரும்புவீர்கள் என்பதை உறுதிப்படுத்த, உங்கள் வீட்டுக்கான அடமானப் பத்திரம் (Mortgage statement) அல்லது முகவரி உறுதிப்படுத்தப்பட்ட ஆவணங்களைக் காண்பிப்பது அவசியமென பஃபலோவைச் சேர்ந்த சட்டத்தரணி கிறிஸ்டின் ஜுருசிக் (Christine Jurusik) தெரிவித்துள்ளார்.

அமெரிக்கத் தொழிலாளர் சந்தை: நீங்கள் செய்யப்போகும் வேலையை ஓர் அமெரிக்கப் பிரஜையால் செய்ய முடியும் என்றால், உங்களுக்கு அனுமதி மறுக்கப்பட வாய்ப்புள்ளது. உதாரணமாக, ஓவியம் தீட்டுதல் போன்ற திறன் தேவையற்ற உடல் உழைப்பு வேலைகளுக்குச் செல்வதை முற்றாகத் தவிர்க்க வேண்டும்.

முதலீடுகள்: அமெரிக்காவில் வர்த்தக முதலீடுகளைச் செய்ய அனுமதி உண்டு. ஆனால், உரிய விசா இன்றி அங்குள்ள உணவகங்களையோ அல்லது வணிகங்களையோ நிர்வகிக்க (Manage) அனுமதி கிடையாது.

தொலைதூர வேலை (Remote Work)

கனடிய நிறுவனங்களுக்காக அமெரிக்காவிலிருந்து நீண்டகாலம் 'ரிமோட்' முறையில் பணியாற்றுவது எல்லைப் பகுதிகளில் கடும் நெருக்கடியை ஏற்படுத்தலாம். நீங்கள் அங்கு எவ்வித நேரடி உழைப்பிலும் (Hands-on labour) ஈடுபடவில்லை என்பதைத் தெளிவுபடுத்துவது அவசியமாகும்.

அமெரிக்கா செல்வதற்கு முன்னர், அரசாங்கத்தின் உத்தியோகபூர்வ வழிகாட்டிக் கையேடுகளை (Reference Manual) ஒருமுறை மீளாய்வு செய்வது பாதுகாப்பானது என நிபுணர்கள் மேலதிகமாகச் சுட்டிக்காட்டியுள்ளனர்.