அல்பர்ட்டா எதிர்நோக்கியுள்ள சவால்கள் மிகச் சிக்கலானவை: அரசியல் ஆய்வாளர்கள் எச்சரிக்கை!

அல்பர்ட்டா மாகாணத்தின் சனத்தொகை அதிகரிப்பு மற்றும் குடிவரவு கொள்கைகள் தொடர்பில் மாகாண அரசாங்கம் முன்வைக்கும் வாதங்கள், நடைமுறையிலுள்ள உண்மையான சிக்கல்களை மறைப்பதாக அமையக் கூடாது என அரசியல் ஆய்வாளர்கள் சுட்டிக்காட்டியுள்ளனர்.

அல்பர்ட்டா மாகாண முதலமைச்சர் (Premier) டැනியல் ஸ்மித், இன்று (வியாழக்கிழமை) இரவு மாகாண மக்களுக்கு விசேட உரையாற்றவுள்ளார். அடுத்த வாரம் சமர்ப்பிக்கப்படவுள்ள மாகாண வரவுசெலவுத் திட்டத்திற்கு முன்னதாக, குடிவரவு மற்றும் நிதி நெருக்கடிகள் குறித்து அவர் தனது உரையில் முக்கியமாகப் பிரஸ்தாபிப்பார் என எதிர்பார்க்கப்படுகிறது.

"கட்டுப்படுத்த முடியாத வளர்ச்சி"

மாகாணத்தின் உட்கட்டமைப்பு மற்றும் பொதுச் சேவைகள் மீது அதிகரித்து வரும் சுமையைக் குறைப்பதற்கு, குடிவரவு கொள்கைகளில் மாகாண அரசுக்கு மேலதிக அதிகாரம் வழங்கப்பட வேண்டும் என முதலமைச்சர் ஸ்மித் தொடர்ச்சியாக வலியுறுத்தி வருகின்றார்.

"தற்போதைய நிலைமை நீடிக்க முடியாது. இது ஆரோக்கியமானதல்ல. அல்பர்ட்டாவிற்கு வருபவர்கள் கையில் வேலைவாய்ப்புடனேயே வர வேண்டும் என்பதையே நான் விரும்புகிறேன்" என கல்கரியில் நடைபெற்ற ஊடகவியலாளர் சந்திப்பில் அவர் தெரிவித்திருந்தார்.

ஆய்வாளரின் மாறுபட்ட கருத்து

மவுண்ட் ரோயல் பல்கலைக்கழகத்தின் அரசியல் ஆய்வாளர் லோரி வில்லியம்ஸ், இது குறித்துக் கருத்துத் தெரிவிக்கையில், அல்பர்ட்டாவின் தற்போதைய நெருக்கடிகளுக்கு குடிவரவு மட்டுமே காரணம் எனக்கூற முடியாது எனத் தெரிவித்துள்ளார்.

"அல்பர்ட்டா அழைக்கிறது" (Alberta is Calling) போன்ற பிரச்சாரங்கள் மூலம் ஏனைய கனடிய மாகாணங்களிலிருந்து மக்கள் இங்கு குடிபெயர்ந்தமையே சனத்தொகை அதிகரிப்புக்கு முக்கிய காரணமாகும். அத்துடன், சுகாதாரம் மற்றும் கல்வித்துறையில் நிலவும் நீண்டகாலப் பிரச்சினைகளை குடிவரவு கொள்கையின் மீது மட்டும் சுமத்துவது சரியானதல்ல என அவர் சுட்டிக்காட்டியுள்ளார்.

நிதி நெருக்கடி மற்றும் அரசியல் மோதல்

எண்ணெய் விலை வீழ்ச்சி மற்றும் அதிகரித்து வரும் செலவீனங்கள் காரணமாக, எதிர்வரும் வரவுசெலவுத் திட்டம் சவாலானதாக இருக்கும் என அரசாங்கம் ஏற்கனவே எச்சரித்துள்ளது.

இதேவேளை, முதலமைச்சரின் உரை குறித்துக் கருத்து வெளியிட்டுள்ள எதிர்க்கட்சியான NDP, அரசாங்கம் தனது நிர்வாகச் சீர்கேடுகளை மறைப்பதற்காக மற்றவர்கள் மீது பழிசுமத்தும் (Scapegoating) செயலில் ஈடுபடுவதாகக் குற்றஞ்சாட்டியுள்ளது.

"அல்பர்ட்டாவின் கல்வி மற்றும் சுகாதாரத்துறை சீர்குலைந்துள்ளது. மக்களின் வாழ்க்கைச் செலவு அதிகரித்துள்ளது. இவற்றுக்குப் பொறுப்பேற்பதை விடுத்து, மத்திய அரசு அல்லது புதிய குடிவரவாளர்கள் மீது பழிசுமத்துவதை மக்கள் ஏற்கமாட்டார்கள்" என NDP கட்சியின் பிரதித் தலைவி ராகி பஞ்சோலி காரசாரமாகத் தெரிவித்துள்ளார்.

மத்திய அரசின் புதிய நகர்வு

மாகாண மட்டத்தில் இவ்வாறான விவாதங்கள் இடம்பெறும் பின்னணியில், கனடிய மத்திய அரசு 'எக்ஸ்பிரஸ் என்ட்ரி' (Express Entry) திட்டத்தில் புதிய மாற்றங்களை அறிமுகப்படுத்தியுள்ளது. தகுதியுள்ள பணியாளர்களை விரைவாகக் கவர்ந்திழுப்பதன் மூலம் நாட்டின் பொருளாதார வளர்ச்சியை உறுதிப்படுத்த முடியும் என கனேடிய குடிவரவு அமைச்சர் லெனா மெட்லெஜ் தியாப் நம்பிக்கை வெளியிட்டுள்ளார்.

எவ்வாறாயினும், உள்ளூர் இளைஞர்களின் வேலைவாய்ப்புகளைப் பாதிக்கும் வகையில் குடிவரவு கொள்கைகள் அமையக் கூடாது என மத்திய கன்சர்வேடிவ் கட்சியினர் கடும் எதிர்ப்பு வெளியிட்டுள்ளமை குறிப்பிடத்தக்கது.