மெக்சிகோவில் போதைப்பொருள் கும்பல் தலைவன் சுட்டுக்கொலை: வன்முறை வெடித்ததால் கனேடியர்கள் முடக்கம்!

மெக்சிகோவின் பல பகுதிகளில் ஞாயிற்றுக்கிழமை திடீரென வெடித்த வன்முறைச் சம்பவங்களினால், அங்கு தங்கியுள்ள பெருமளவான கனேடியர்கள் பாதுகாப்பான இடங்களுக்குள் முடங்கியுள்ளதுடன், விமான நிலையங்கள் மூடப்பட்டதால் பலர் நாடு திரும்ப முடியாமல் நடுத்தெருவில் தவிக்கும் நிலை ஏற்பட்டுள்ளது.

மெக்சிகோவின் சக்திவாய்ந்த போதைப்பொருள் கடத்தல் கும்பலான 'ஜலிஸ்கோ நியூ ஜெனரேஷன் கார்டெல்' (Jalisco New Generation Cartel) அமைப்பின் தலைவர் 'எல் மென்சோ' என அழைக்கப்படும் நெமேசியோ ரூபன் ஒஸ்குவேரா செர்வாண்டஸ் (Nemesio Ruben Oseguera Cervantes), அரசாங்கப் படையினரின் விசேட தேடுதல் நடவடிக்கையின் போது கொல்லப்பட்டார். இதனைத் தொடர்ந்தே ஜலிஸ்கோ மாநிலம் முழுவதும் வன்முறை பரவியுள்ளது.

விமான நிலையத்தில் நிலவிய பதற்றம்:

கனேடியப் பிரஜையான வெண்டி புலோ (Wendy Buelow) மற்றும் அவரது கணவர் டேவ் ஆகியோர் வின்னிபெக் நகருக்குப் புறப்படவிருந்த வேளையில், இராணுவத்தினர் விமான நிலையத்தைக் கைப்பற்றி மூடினர்.

"துப்பாக்கிச் சூடு போன்ற பாரிய சத்தங்கள் கேட்டன. நாங்கள் எமது பயணப் பொதிகள் வரும் இடத்திற்குப் பின்னால் பதுங்கிக்கொண்டோம். மக்கள் கதறி அழுதனர், அங்கு ஒரு யுத்தக் களத்தைப் போன்ற பதற்றம் நிலவியது" என வெண்டி புலோ தெரிவித்துள்ளார்.

விமான நிலைய ஓடுபாதைக்குள் மக்கள் விரட்டப்பட்டதாகவும், பின்னர் பஸ்கள் மூலம் அவர்கள் பாதுகாப்பாக கட்டிடத்திற்குள் கொண்டு வரப்பட்டதாகவும் தெரியவருகிறது. தற்போது சுமார் 19,000 கனேடியர்கள் மெக்சிகோவில் உள்ளதாக கனேடிய வெளிவிவகார அமைச்சு (Global Affairs Canada) மதிப்பிட்டுள்ளது.

ஸ்தம்பிதமடைந்த போக்குவரத்து:

வன்முறை காரணமாக வெஸ்ட்ஜெட் (WestJet), எயார் கனடா (Air Canada) உள்ளிட்ட பல விமான நிறுவனங்கள் தமது சேவைகளை இரத்துச் செய்துள்ளன. வீதிகள் எங்கும் வாகனங்கள் தீயிட்டுக் கொளுத்தப்பட்டு வீதித்தடைகள் ஏற்படுத்தப்பட்டுள்ளதால், டாக்ஸி மற்றும் ஏனைய போக்குவரத்துச் சேவைகள் முற்றாக இடைநிறுத்தப்பட்டுள்ளன.

கனேடிய அமைச்சரின் அறிக்கை:

மெக்சிகோவின் தற்போதைய பாதுகாப்பு நிலைமை குறித்து கனேடிய வெளிவிவகார அமைச்சர் அனிதா ஆனந்த் (Anita Anand) தனது கவலையை வெளியிட்டுள்ளார். உள்ளூர் அதிகாரிகளுடன் தாம் நெருங்கிய தொடர்பில் இருப்பதாகவும், அங்குள்ள கனேடியர்களுக்குத் தேவையான உதவிகளை வழங்கத் தயாராக இருப்பதாகவும் அவர் குறிப்பிட்டுள்ளார்.

உணவுத் தட்டுப்பாடு ஏற்படலாம் என அச்சம்:

தற்போது அங்கு தங்கியுள்ள பிரிட்டிஷ் கொலம்பியாவைச் சேர்ந்த டேவிட் மெக்னமாரா கூறுகையில், "வீதியெங்கும் வாகனங்கள் எரிக்கப்படுவதால் எழுந்த கறுப்புப் புகை சூழ்ந்துள்ளது. இந்த முடக்கல் நிலை நீடித்தால், விடுதிகள் மற்றும் விற்பனை நிலையங்களில் உணவுத் தட்டுப்பாடு ஏற்பட வாய்ப்புள்ளது" என எச்சரித்துள்ளார்.

அமெரிக்காவினால் 'சர்வதேச பயங்கரவாத அமைப்பு' எனப் பெயரிடப்பட்டுள்ள இந்தக் கடத்தல் கும்பலின் தலைவர் கொல்லப்பட்டமை, மெக்சிகோவில் பாரிய அமைதியின்மையை ஏற்படுத்தியுள்ளமை குறிப்பிடத்தக்கது.