கனடா - அமெரிக்க எல்லையில் துப்பாக்கிச் சூடு: ஒருவர் படுகாயம்; FBI தீவிர விசாரணை!

கனடா மற்றும் அமெரிக்காவின் நியூ ஹாம்ஷயர் (New Hampshire) மாநில எல்லைப்பகுதியில் அமைந்துள்ள சோதனைச் சாவடிக்கு அருகே இடம்பெற்ற துப்பாக்கிச் சூட்டுச் சம்பவம் தொடர்பில் அமெரிக்க மத்திய புலனாய்வுப் பிரிவினர் (FBI) விசாரணைகளை ஆரம்பித்துள்ளனர்.

அமெரிக்காவின் பிட்ஸ்பர்க் (Pittsburg) நகரில் அமைந்துள்ள எல்லைச் சோதனைச் சாவடிக்கு அருகாமையில் ஞாயிற்றுக்கிழமை அதிகாலை 1 மணியளவில் இந்தச் சம்பவம் இடம்பெற்றுள்ளது. அங்கிருந்த எல்லைப் பாதுகாப்பு அதிகாரி ஒருவரை இலக்கு வைத்து நபர் ஒருவர் துப்பாக்கிப் பிரயோகம் மேற்கொண்டுள்ளார்.

இதனைத் தொடர்ந்து குறித்த பாதுகாப்பு அதிகாரி தற்காப்புக்காக நடத்திய பதில் தாக்குதலில் சந்தேகநபர் காயமடைந்துள்ளார். காயமடைந்த நபர் தற்போது வைத்தியசாலையில் அனுமதிக்கப்பட்டு சிகிச்சை பெற்று வருவதாகத் தெரிவிக்கப்படுகிறது.

இந்தச் சம்பவத்தில் எல்லைப் பாதுகாப்பு அதிகாரிக்கு எவ்வித காயங்களும் ஏற்படவில்லை என அதிகாரிகள் உறுதிப்படுத்தியுள்ளனர். இச்சம்பவம் குறித்து எப்.பி.ஐ-இன் பொஸ்டன் கள அலுவலகம் மற்றும் நியூ ஹாம்ஷயர் மாவட்ட சட்டத்தரணிகள் அலுவலகம் ஆகியன இணைந்து விசாரணைகளை முன்னெடுத்து வருகின்றன.

கனடாவின் கியூபெக் (Quebec) மாகாண எல்லையை ஒட்டிய நியூ ஹாம்ஷயரின் ஒரேயொரு எல்லைக் கடப்புப் பகுதியாக இது காணப்படுகின்றது. பொதுவாக அமைதியான சூழல் நிலவும் இந்தப் பகுதியில் இடம்பெற்ற இந்தத் துப்பாக்கிச் சூட்டுச் சம்பவம் பெரும் பரபரப்பை ஏற்படுத்தியுள்ளது.

சந்தேகநபரின் விபரங்கள் அல்லது தாக்குதலுக்கான காரணம் குறித்து இதுவரை எவ்வித உத்தியோகபூர்வ தகவல்களும் வெளியிடப்படவில்லை. சந்தேகநபர் மீது குற்றச்சாட்டுகள் பதிவு செய்யப்பட்ட பின்னரே மேலதிக விபரங்கள் அறிவிக்கப்படும் என அமெரிக்க சட்டத்தரணிகள் அலுவலகம் தெரிவித்துள்ளது.