ட்ரம்ப் மீதான இரகசிய ஆவண வழக்கு: விசாரணை அறிக்கையை வெளியிட நீதிமன்றம் நிரந்தரத் தடை

அமெரிக்க ஜனாதிபதி டொனால்ட் ட்ரம்ப், தனது முதலாவது பதவிக்காலம் முடிந்த பின்னர் சட்டவிரோதமான முறையில் அரசாங்கத்தின் இரகசிய ஆவணங்களைத் தனது இல்லத்தில் வைத்திருந்ததாக சுமத்தப்பட்ட குற்றச்சாட்டு தொடர்பான விசாரணை அறிக்கையை வெளியிடுவதற்கு புளோரிடா நீதிமன்றம் இன்று நிரந்தரத் தடையுத்தரவு பிறப்பித்துள்ளது.

இந்த வழக்கினை விசாரித்த அமெரிக்க மாவட்ட நீதிபதி எய்லின் கேனன் (Aileen Cannon), இந்த அறிக்கையை வெளியிடுவது டொனால்ட் ட்ரம்ப் மற்றும் அவருடன் குற்றம் சுமத்தப்பட்ட ஏனைய இருவருக்கு இழைக்கப்படும் "வெளிப்படையான அநீதி" (Manifest Injustice) எனத் தெரிவித்துள்ளார்.

இந்த வழக்கு தள்ளுபடி செய்யப்பட்டதாலும், இது ஒருபோதும் நடுவர் மன்றத்தின் (Jury) விசாரணைக்கு வராததாலும், இதில் உள்ள குற்றச்சாட்டுகளைப் பகிரங்கப்படுத்துவது குற்றம் சுமத்தப்பட்டவர்களின் நற்பெயருக்குப் பாதிப்பை ஏற்படுத்தும் என நீதிபதி சுட்டிக்காட்டியுள்ளார்.

டொனால்ட் ட்ரம்ப் தனது மார்-ஏ-லாகோ (Mar-a-Lago) இல்லத்தில் அமெரிக்க தேசிய பாதுகாப்பு தொடர்பான இரகசிய ஆவணங்களைச் சட்டவிரோதமாகப் பாதுகாத்து வைத்திருந்ததாகவும், அதனை மீளப் பெறுவதற்கான அரசாங்கத்தின் முயற்சிகளுக்கு முட்டுக்கட்டை போட்டதாகவும் குற்றம் சுமத்தப்பட்டிருந்தது.

இருப்பினும், இந்த வழக்கை விசாரித்த விசேட சட்டத்தரணி ஜாக் ஸ்மித்தின் (Jack Smith) நியமனம் சட்டவிரோதமானது எனக் கூறி, கடந்த 2024 ஆம் ஆண்டு நீதிபதி கேனன் இந்த வழக்கைத் தள்ளுபடி செய்திருந்தார்.

சர்ச்சையும் விமர்சனமும்: இந்த அறிக்கையை வெளியிடுவதற்குத் தடை விதிக்கப்பட்டுள்ளதன் மூலம், ட்ரம்ப் எதிர்கொண்ட நான்கு பிரதான குற்றவியல் வழக்குகளில் ஒன்றின் முக்கிய தகவல்கள் பொதுமக்களுக்குத் தெரியாமலேயே முடக்கப்பட்டுள்ளன.

இந்தத் தீர்ப்புக்கு எதிராகப் பல சிவில் உரிமை அமைப்புகள் கவலை வெளியிட்டுள்ளதுடன், இது அரசாங்கத்தின் வெளிப்படைத்தன்மையைக் கேள்விக்குறியாக்கியுள்ளதாக விமர்சித்துள்ளன.

இருப்பினும், ட்ரம்பின் சட்டத்தரணிகள் இந்தத் தீர்ப்பை வரவேற்றுள்ளதுடன், இது அரசியலமைப்பு வழங்கியுள்ள தனிநபர் பாதுகாப்பு மற்றும் நீதியான விசாரணைக்கான வெற்றி என வர்ணித்துள்ளனர்.