ஈரான் மீதான அமெரிக்க-இஸ்ரேல் போர் நடவடிக்கை: வணிகக் கப்பல்களுக்கு கடும் எச்சரிக்கை!

ஈரான் மீது அமெரிக்காவும் இஸ்ரேலும் இணைந்து 'முக்கியமான இராணுவ நடவடிக்கைகளை' (Major combat operations) முன்னெடுத்துள்ள நிலையில், மத்திய கிழக்கு பிராந்தியம் பெரும் போர் பதற்றத்தை எதிர்கொண்டுள்ளது.

வணிகக் கப்பல்களுக்கு அமெரிக்கா எச்சரிக்கை:

ஈரான் மீதான தாக்குதல்களைத் தொடர்ந்து, வளைகுடாப் பிராந்தியத்தில் 'முக்கியமான இராணுவ நடவடிக்கைகள்' இடம்பெற்று வருவதால், வணிகக் கப்பல்கள் இப்பகுதியைத் தவிர்த்துச் செல்லுமாறு அமெரிக்க போக்குவரத்துத் திணைக்களம் வலியுறுத்தியுள்ளது.

ஹோர்முஸ் நீரிணை, வளைகுடா, ஓமன் வளைகுடா மற்றும் அரபிக் கடல் பகுதிகளில் குறிப்பிடத்தக்க அளவிலான இராணுவ நடவடிக்கைகள் இடம்பெறுவதாகவும், முடிந்தவரை கப்பல்கள் இப்பகுதிகளுக்குள் செல்வதைத் தவிர்க்குமாறும் அமெரிக்க கடல்சார் நிர்வாகம் தனது அறிக்கையில் தெரிவித்துள்ளது.

மேலும், அமெரிக்கக் கப்பல்களுடன் எந்தவொரு தவறான புரிதலும் ஏற்படாமல் இருக்க, அமெரிக்காவிற்குச் சொந்தமான அல்லது அமெரிக்கக் குழுவினரைக் கொண்ட கப்பல்கள், அமெரிக்க இராணுவக் கப்பல்களிலிருந்து 30 கடல் மைல் (சுமார் 56 கி.மீ) தொலைவில் இருக்குமாறு அறிவுறுத்தப்பட்டுள்ளன.

இதற்கிடையில், கத்தாரில் கடல்சார் போக்குவரத்து தற்காலிகமாக இடைநிறுத்தப்பட்டுள்ளதாக அந்நாட்டு போக்குவரத்து அமைச்சு தெரிவித்துள்ளது.

தொடரும் தாக்குதல்கள்:

ஈரான் மீது வான் மற்றும் கடல் வழியாக 'விரிவான' (Extensive) தாக்குதல்களைத் தொடரப்போவதாக அமெரிக்க அதிகாரி ஒருவர் அல்-ஜசீரா செய்தி நிறுவனத்திடம் தெரிவித்துள்ளார். ஈரானின் இருப்பிற்கே அச்சுறுத்தலாக விளங்கும் சக்திகளை நீக்குவதே தமது நோக்கம் என இஸ்ரேலியத் தலைவர்கள் தெரிவித்துள்ளனர்.

பாதிக்கப்பட்ட மாகாணங்கள்:

ஈரானின் 32 மாகாணங்களில் குறைந்தபட்சம் 20 மாகாணங்கள் தாக்குதலுக்கு இலக்காகியுள்ளதாக ஈரானிய செம்பிறைச்சங்கத்தின் பேச்சாளர் மொஜ்தபா கலேடி தெரிவித்துள்ளார்.

பாடசாலை மீது தாக்குதல்:

தெற்கு ஹோர்மோஸ்கான் மாகாணத்தில் உள்ள மின்னாப் நகரில் அமைந்துள்ள சிறுமியர் ஆரம்பப் பாடசாலை மீது இஸ்ரேல் நடத்திய தாக்குதலில் பலியானவர்களின் எண்ணிக்கை 85 ஆக உயர்ந்துள்ளதாக, அரைகுறை அதிகாரபூர்வ 'தஸ்னிம்' செய்தி நிறுவனம் தெரிவித்துள்ளது. இருப்பினும், இத்தகவலைத் தனிப்பட்ட முறையில் உறுதிப்படுத்த முடியவில்லை என அல்-ஜசீரா குறிப்பிட்டுள்ளது.

ஈரானியத் தலைவர்:

ஈரானின் உயர் தலைவர் அயதுல்லா அலி கமேனி, தனக்குத் தெரிந்தவரை உயிருடன் இருப்பதாக அந்நாட்டு வெளிவிவகார அமைச்சர் அப்பாஸ் அரக்சி, என்.பி.சி (NBC) செய்தி நிறுவனத்துடனான நேர்காணலில் கூறியுள்ளார்.

ஏவுகணை எச்சரிக்கை:

ஈரான் ஏவுகணைகளை ஏவியதைத் தொடர்ந்து, இஸ்ரேலின் பல்வேறு பகுதிகளில் வான்வழித் தாக்குதல் எச்சரிக்கைகள் விடுக்கப்பட்டுள்ளதாக அந்நாட்டு இராணுவம் தெரிவித்துள்ளது.

அமெரிக்க இலக்குகள்:

வளைகுடா அரபு நாடுகளில் உள்ள அமெரிக்க இலக்குகள் மீதும் ஈரான் தாக்குதல் நடத்தியுள்ளது. கட்டார், ஐக்கிய அரபு அமீரகம், பஹ்ரைன், ஜோர்தான், சவூதி அரேபியா மற்றும் குவைத் ஆகிய நாடுகளில் உள்ள அமெரிக்கத் துருப்புக்கள் தங்கியிருக்கும் தளங்கள் மீது தாக்குதல்கள் இடம்பெற்றுள்ளன. இப்பகுதிகளில் வெடிச்சத்தங்களும் ஏவுகணைகள் இடைமறிக்கப்பட்டதும் பதிவாகியுள்ளன.

ஜோர்தான் இராணுவத்தின் அறிக்கை:

49 ட்ரோன்கள் மற்றும் ஏவுகணைகள் இடைமறிப்பு

ஜோர்தானின் அரச செய்தி நிறுவனம், தனது வான்பரப்பிற்குள் உள்நுழைந்த தாக்குதல்களை முறியடித்ததாக அந்நாட்டு இராணுவத்தின் தகவலை மேற்கோள் காட்டி செய்தி வெளியிட்டுள்ளது.

"எமது வான்பரப்பை இலக்கு வைத்து வந்த 13 ஏவுகணைகளை ஜோர்தான் வான் பாதுகாப்பு அமைப்புகள் வெற்றிகரமாக இடைமறித்து அழித்துள்ளன. அத்துடன், வந்தடைந்த ட்ரோன்கள் தாக்கி அழிக்கப்பட்டுள்ளன" என இராணுவ வட்டாரங்கள் தெரிவித்துள்ளன.

இந்த வான்வழித் தாக்குதல் நடவடிக்கைகளால் சொத்து சேதங்கள் ஏற்பட்டுள்ள போதிலும், உயிர்ச்சேதங்கள் எவையும் இதுவரை பதிவாகவில்லை என அந்த அறிக்கையில் மேலும் குறிப்பிடப்பட்டுள்ளது.