'எந்தவொரு நாட்டுக்கும் எதிரான போர் மற்றும் பாதிப்பை ஏற்படுத்த இலங்கையின் நிலப்பரப்பு, கடல் எல்லை, வான்வெளியைப் பயன்படுத்த இடமளிக்கோம்'

ஈரானுக்குச் சொந்தமான ‘IRIS Bushehr’ கப்பலை திருகோணமலை துறைமுகத்திற்கு கொண்டு வர நடவடிக்கை எடுக்கப்பட்டுள்ளதாக ஜனாதிபதி அனுர குமார திஸாநாயக்க தெரிவித்துள்ளார்.

ஜனாதிபதி செயலகத்தில் ஊடகங்களிடம் கருத்து வெளியிட்ட அவர், அந்தக் கப்பலில் உள்ள 208 பேரைக் கொண்ட பணிக்குழுவை தற்போது கொழும்பு துறைமுகத்துக்கு கொண்டு வர தேவையான நடவடிக்கைகள் மேற்கொள்ளப்பட்டு வருவதாக தெரிவித்தார்.

இதன்போது ஜனாதிபதி மேலும் கூறியதாவது, இலங்கையின் நிலப்பரப்பு, கடல் எல்லை மற்றும் வான்வெளி ஆகியவை எந்த நாட்டிற்கும் போர் அல்லது மோதல் சூழ்நிலைகளில் பாகுபாடு காட்டும் வகையில் பயன்படுத்த அனுமதிக்கப்படமாட்டாது என்றும், வேறு எந்த நாட்டுக்கும் பாதிப்பு ஏற்படும் விதமாக பயன்படுத்தவும் இடமளிக்கப்படமாட்டாது என்றும் அவர் வலியுறுத்தினார்.

குறிப்பாக மத்திய கிழக்கில் நிலவும் மோதல்களிலும், உலகில் ஏற்படும் ஏனைய சர்வதேச மோதல்களிலும் இலங்கை நடுநிலையான நிலைப்பாட்டை பின்பற்றுவதாகவும் அவர் தெரிவித்தார். அதேவேளை மனிதாபிமானத்தை முதன்மையாகக் கொண்டு மனித உயிர்களை பாதுகாப்பதற்காக தேவையான எந்த நடவடிக்கைகளையும் எடுக்க இலங்கை தயங்காது என்றும் அவர் கூறினார்.

கடந்த பெப்ரவரி 26ஆம் திகதி ஈரான் மூன்று கடற்படை கப்பல்களை மார்ச் 9 முதல் 13ஆம் தேதி வரை நான்கு நாட்கள் காலப்பகுதிக்குள் இலங்கை துறைமுகங்களுக்கு வர அனுமதி கோரி வெளிவிவகார அமைச்சகத்திடம் விண்ணப்பித்திருந்ததாகவும் ஜனாதிபதி தெரிவித்தார்.

அது ஒத்துழைப்பு பயணம் என குறிப்பிடப்பட்டிருந்தாலும், பின்னர் மேற்கொள்ளப்பட்ட ஆய்வுகளில் அவை இலங்கையின் தேசிய கடற்பரப்பிற்கு வெளியே, அதன் அருகிலேயே நிலைத்திருந்ததாக தெரியவந்ததாகவும் அவர் கூறினார்.

இதற்கிடையில் பெப்ரவரி 27ஆம் திகதி அந்தக் கப்பலில் இருந்த ஒரு கடற்படை வீரர் விபத்தில் காயமடைந்ததாக தகவல் கிடைத்ததையடுத்து, அவரையும் அவரைக் கவனித்த அதிகாரியையும் மனிதாபிமான காரணங்களுக்காக கரைக்கு கொண்டு வர அனுமதி கோரப்பட்டதாகவும் ஜனாதிபதி தெரிவித்தார்.

அதன்படி இலங்கை கடற்படை மற்றும் வான்படை இணைந்து அவர்களை கரைக்கு கொண்டு வந்து தேவையான மருத்துவ சிகிச்சைக்கு அனுப்பியதாகவும் அவர் குறிப்பிட்டார்.

மேலும் மார்ச் 4ஆம் திகதி அதிகாலை 5.08 மணி முதல் 5.30 மணி வரையிலான நேரப்பகுதியில் இலங்கை கடற்பரப்பிற்கு வெளியே, காலி துறைமுகத்திலிருந்து சுமார் 19 கடல் மைல் தூரத்தில் இருந்த ஒரு கப்பல் மீது தாக்குதல் நடத்தப்பட்டதாகவும், அந்தப் பகுதியில் இருந்து அவசர அபாயச் சிக்னல்கள் வந்ததாகவும் தகவல் கிடைத்ததாக ஜனாதிபதி தெரிவித்தார்.

இதையடுத்து இலங்கை கடற்படை மற்றும் வான்படை இணைந்து பெரும் மீட்பு நடவடிக்கையை முன்னெடுத்ததாகவும், அதில் 32 பேரை உயிருடன் மீட்க முடிந்ததாகவும் அவர் கூறினார். அதேசமயம் 84 பேரின் உடல்கள் கண்டெடுக்கப்பட்டதாகவும் அவர் தெரிவித்தார்.

மீட்கப்பட்ட காயமடைந்தவர்கள் தற்போது கராப்பிட்டிய போதனா வைத்தியசாலையில் சிகிச்சை பெற்று வருவதாகவும் அவர் குறிப்பிட்டார்.

இதற்கிடையில் விவாதத்திற்கு உள்ளாகியுள்ள IRIS Bushehr கப்பல் மார்ச் 4 மற்றும் 5 ஆகிய நாட்களில் இலங்கை துறைமுகத்தில் தங்க அனுமதி வழங்குமாறு வெளிவிவகார அமைச்சகத்திடம் கோரிக்கை விடுத்ததாகவும் ஜனாதிபதி தெரிவித்தார்.

இதனையடுத்து இலங்கை வெளிவிவகார அமைச்சர் மற்றும் ஈரான் வெளிவிவகார அமைச்சர் இடையே கலந்துரையாடல்கள் நடைபெற்றதுடன், இரு நாடுகளின் தூதரகங்களும் அமைச்சகங்களும் இடையே ஆலோசனைகள் முன்னெடுக்கப்பட்டதாகவும் அவர் கூறினார்.

பின்னர் அந்தக் கப்பலின் ஒரு இயந்திரத்தில் கோளாறு ஏற்பட்டுள்ளதாக தகவல் கிடைத்ததாகவும், அத்தகைய சூழ்நிலையில் நடுநிலையான நாடாக இலங்கை எவ்வாறு செயல்பட வேண்டும் என்பது குறித்து ஐக்கிய நாடுகள் கடல் சட்டம் மற்றும் 1907 ஹேக் உடன்படிக்கை உள்ளிட்ட சர்வதேச உடன்படிக்கைகள் அடிப்படையில் கவனமாக ஆய்வு செய்யப்பட்டதாகவும் ஜனாதிபதி தெரிவித்தார்.

அந்த ஆலோசனைகளின் பின்னர், கப்பலில் உள்ளவர்களை பாதுகாப்பாக கரைக்கு கொண்டு வருவதற்கும் கப்பலை எங்கு நிறுத்துவது என்பதற்கும் தொடர்பாக இரு தரப்பும் ஒருமித்த முடிவிற்கு வந்ததாகவும் அவர் கூறினார்.

கொழும்பு துறைமுகம் இலங்கையின் முக்கிய வர்த்தக துறைமுகமாக இருப்பதால், அங்கு இத்தகைய கப்பலை நிறுத்துவது வர்த்தக நடவடிக்கைகளுக்கு பாதிப்பை ஏற்படுத்தக்கூடும் எனக் கருதி, அந்தக் கப்பலை திருகோணமலை துறைமுகத்திற்கு கொண்டு செல்ல தீர்மானிக்கப்பட்டதாக ஜனாதிபதி தெரிவித்தார்.

அதற்கு முன், அந்தக் கப்பலில் உள்ள 208 பேரை கொழும்பு துறைமுகத்திற்கு கொண்டு வர நடவடிக்கை எடுக்கப்பட்டுள்ளதாகவும் அவர் கூறினார். இதில் 53 அதிகாரிகள், 84 கேடெட் அதிகாரிகள், 48 மூத்த கடற்படை வீரர்கள் மற்றும் 23 கடற்படை வீரர்கள் உள்ளதாகவும் அவர் தெரிவித்தார்.

இவர்களை முதலில் கரைக்கு கொண்டு வந்த பின்னர், தேவையான பணிக்குழுவுடன் அந்தக் கப்பலை இலங்கை கடற்படையின் உதவியுடன் திருகோணமலை துறைமுகத்திற்கு கொண்டு செல்ல திட்டமிடப்பட்டுள்ளதாகவும் ஜனாதிபதி தெரிவித்தார்.

இலங்கை ஒரு சுயாட்சி மற்றும் சுதந்திரமான நாடாகும் என்பதை வலியுறுத்திய ஜனாதிபதி, நாட்டின் மக்களின் பாதுகாப்பு, கடற்பரப்பு மற்றும் தேசிய நலன்கள் ஆகியவற்றை முன்னிறுத்தியே அனைத்து தீர்மானங்களும் எடுக்கப்படுவதாக தெரிவித்தார்.

மேலும் உலகில் நிலவும் போர் சூழ்நிலையில் மனித உயிர்கள் பலியாகி வருவதால், உலகிற்கு இன்றியமையாதது அமைதியே என அவர் குறிப்பிட்டார். எனவே அனைத்து தரப்பினரும் உலக அமைதிக்காக உறுதியாக செயல்பட வேண்டும் என்றும் அவர் கேட்டுக்கொண்டார்.

மனித உயிர்களை பாதுகாப்பதும், சர்வதேச உடன்படிக்கைகளை மதிப்பதும் மற்றும் இலங்கையின் கௌரவத்தை காக்கும் வகையிலும் அரசு இந்த நடவடிக்கைகளை மேற்கொண்டுள்ளதாக ஜனாதிபதி அனுர குமார திஸாநாயக்க மேலும் தெரிவித்தார்.

மத்திய கிழக்கு மோதலில் இலங்கை நடுநிலை நிலைப்பாடு

மத்திய கிழக்கில் தொடரும் போர் நிலைமையில் இலங்கை நடுநிலை நிலைப்பாட்டைத் தொடரும் என்றும், எந்த நாட்டிற்கும் ஆதரவாக இலங்கையின் நிலப்பரப்பு, கடல் எல்லை அல்லது வான்வெளியை பயன்படுத்த அனுமதிக்கப்படமாட்டாது என்றும் ஜனாதிபதி அனுர குமார திஸாநாயக்க தெரிவித்துள்ளார்.

வியாழக்கிழமை ஜனாதிபதி செயலகத்தில் நடைபெற்ற விசேட ஊடக சந்திப்பில் கருத்து வெளியிட்ட அவர், இலங்கையின் கடற்பரப்பிற்கு அருகில் இருந்த ஈரான் கடற்படை கப்பல்களைச் சுற்றிய சம்பவங்களில் இலங்கை எடுத்த நடவடிக்கைகள் நடுநிலையும் மனிதாபிமானக் கொள்கைகளும் அடிப்படையாகக் கொண்டதாக இருந்ததாக தெரிவித்தார்.

மனித உயிர்களை பாதுகாப்பதற்கான நடவடிக்கைகளை எடுக்க இலங்கை எவ்வித தயக்கமும் காட்டாது என்றும், அதேசமயம் நாட்டின் இறையாண்மை மற்றும் சர்வதேச பொறுப்புகளையும் பாதுகாக்கும் என்றும் ஜனாதிபதி கூறினார்.

ஈரானுக்குச் சொந்தமான IRIS Bushehr என்ற கடற்படை கப்பலில் இருந்த 208 பணியாளர்களை கரைக்கு இறக்க இலங்கை கடற்படை நடவடிக்கை ஆரம்பித்துள்ளதாகவும் அவர் தெரிவித்தார். இந்தக் குழுவினர் முதலில் கரைக்கு கொண்டு வரப்பட்டு, பின்னர் அந்தக் கப்பலை திருகோணமலை துறைமுகத்திற்கு மாற்ற நடவடிக்கை எடுக்கப்படும் என்றும் அவர் கூறினார்.

அந்தக் குழுவில் 53 அதிகாரிகள், 84 கேடெட் அதிகாரிகள், 48 மூத்த கடற்படை வீரர்கள் மற்றும் 23 கடற்படை வீரர்கள் உள்ளதாகவும் ஜனாதிபதி தெரிவித்தார்.

கொழும்பு துறைமுகம் இலங்கையின் முக்கிய வர்த்தக துறைமுகமாக இருப்பதால், அங்கு இத்தகைய கப்பலை நிறுத்துவது கடல்சார் வர்த்தக நடவடிக்கைகளுக்கு பாதிப்பு ஏற்படுத்தக்கூடும் என்பதைக் கருத்தில் கொண்டு அந்தக் கப்பலை திருகோணமலை துறைமுகத்திற்கு கொண்டு செல்ல தீர்மானிக்கப்பட்டதாகவும் அவர் குறிப்பிட்டார்.

இதேவேளை, இலங்கையின் கடற்பரப்பிற்கு அருகில் இருந்த மற்றொரு ஈரான் கப்பல் மீது மேற்கொள்ளப்பட்ட தாக்குதல் சம்பவத்தையும் ஜனாதிபதி சுட்டிக்காட்டினார்.

முக்கிய நிகழ்வுகளின் காலவரிசை

பெப்ரவரி 26

மார்ச் 9 முதல் 13 வரை இலங்கை துறைமுகங்களுக்கு மூன்று ஈரான் கடற்படை கப்பல்கள் வர அனுமதி கோரி ஈரான், இலங்கை வெளிவிவகார அமைச்சகத்திடம் விண்ணப்பித்தது.

பெப்ரவரி 27

இலங்கை கடற்பரப்பிற்கு அருகில் இருந்த IRIS Bushehr கப்பலில் பணியாற்றிய ஒரு கடற்படை வீரர் காயமடைந்ததாக தகவல் கிடைத்தது. இதையடுத்து இலங்கை கடற்படை மற்றும் வான்படை இணைந்து காயமடைந்த வீரரையும் அவருடன் இருந்த அதிகாரியையும் மருத்துவ சிகிச்சைக்காக கரைக்கு கொண்டு வந்தது.

மார்ச் 4 – அதிகாலை

காலை 5.08 மணி முதல் 5.30 மணி வரை காலி துறைமுகத்திலிருந்து சுமார் 19 கடல் மைல் தொலைவில் இருந்த ஒரு கப்பல் மீது தாக்குதல் நடத்தப்பட்டதாக தகவல் கிடைத்ததுடன், அந்தப் பகுதியில் இருந்து அவசர உதவி சிக்னல்கள் அனுப்பப்பட்டன.

மார்ச் 4 – மீட்பு நடவடிக்கை

இதையடுத்து இலங்கை கடற்படை மற்றும் வான்படை இணைந்து மேற்கொண்ட மீட்பு நடவடிக்கையில் 32 பேர் உயிருடன் மீட்கப்பட்டனர். மேலும் 84 பேரின் உடல்கள் மீட்கப்பட்டன. காயமடைந்தவர்கள் கராப்பிட்டிய போதனா வைத்தியசாலையில் அனுமதிக்கப்பட்டனர்.

மார்ச் 4

IRIS Bushehr கப்பலில் இயந்திர கோளாறு ஏற்பட்டுள்ளதாக தெரிவித்து, இலங்கை துறைமுகத்திற்குள் நுழைய அனுமதி கோரப்பட்டது.

மார்ச் 5

ஈரான் அதிகாரிகளுடனும் தூதரகங்களுடனும் நடைபெற்ற ஆலோசனைகளின் பின்னர், கப்பலில் உள்ள பணியாளர்களை கரைக்கு கொண்டு வந்து, கப்பலை திருகோணமலை துறைமுகத்திற்கு மாற்ற இலங்கை தீர்மானித்தது.

ஜனாதிபதி மேலும் தெரிவித்ததாவது, இந்த முடிவுகள் அனைத்தும் ஐக்கிய நாடுகள் கடல் சட்ட உடன்படிக்கை மற்றும் ஹேக் உடன்படிக்கை உள்ளிட்ட சர்வதேச சட்டங்களின் அடிப்படையில் எடுக்கப்பட்டதாகும்.

இலங்கை தொடர்ந்து நடுநிலையான நிலைப்பாட்டைத் தக்கவைத்துக்கொள்வதோடு, மனிதாபிமானக் காரணங்களின் அடிப்படையிலும் செயல்படும் என்றும் அவர் தெரிவித்தார். நாட்டின் மக்களையும் கடற்பரப்பையும் ஆபத்தில் ஆழ்த்தக்கூடிய எந்த வெளிப்புற அழுத்தங்களையும் இலங்கை ஏற்காது என்றும் அவர் வலியுறுத்தினார்.

மேலும், மோதலில் ஈடுபட்டுள்ள அனைத்து தரப்பினரும் உலக அமைதிக்காக செயல்பட வேண்டும் என்றும் ஜனாதிபதி அழைப்பு விடுத்தார். தற்போதைய போர் உலகளாவிய பொருளாதார மற்றும் மனிதாபிமானப் பிரச்சினைகளை ஏற்படுத்தக்கூடிய அபாயம் உள்ளதாகவும் அவர் எச்சரித்தார்.

இன்றைய உலகிற்கு மிகவும் அவசியமானது அமைதியே எனக் குறிப்பிட்ட ஜனாதிபதி, அமைதிக்காக எடுக்கப்படும் ஒவ்வொரு முயற்சிக்கும் இலங்கை தனது முழுமையான ஆதரவை வழங்க தயாராக இருப்பதாகவும் தெரிவித்தார்.

அதேவேளை, இந்த விவகாரம் குறித்து தவறான தகவல்கள் மற்றும் ஆதாரமற்ற குற்றச்சாட்டுகள் பரவி வருவதாகவும் அவர் குறிப்பிட்டார். இருப்பினும், இலங்கையின் கௌரவத்தையும் மனித உயிர்களையும் பாதுகாப்பதோடு சர்வதேச உடன்படிக்கைகளுக்கு இணங்க செயல்படும் வகையில் அரசு நடவடிக்கை எடுத்து வருவதாகவும் ஜனாதிபதி அனுர குமார திஸாநாயக்க தெரிவித்தார்.

– ஜனாதிபதி ஊடகப் பிரிவு

05.03.2026