வெள்ளை மாளிகை மற்றும் குடியரசுக் கட்சி உறுப்பினர்களுடனான முறுகல் - நோமினை பதவி நீக்கினார் ட்ரம்ப்

அமெரிக்க வெள்ளை மாளிகை அதிகாரிகள் மற்றும் குடியரசுக் கட்சி (GOP) நாடாளுமன்ற உறுப்பினர்களிடையே அதிகரித்து வந்த கடும் அதிருப்தி மற்றும் அதிருப்திகரமான சூழலுக்கு மத்தியில், கிறிஸ்டி நோமினை (Kristi Noem) ஜனாதிபதி டொனால்ட் ட்ரம்ப் பதவியிலிருந்து அதிரடியாக நீக்கியுள்ளார்.

அமெரிக்க நிருவாகத்தின் உயர்மட்ட மட்டத்தில் நிலவி வந்த நீண்டகால இழுபறிகள் மற்றும் நிர்வாகச் சிக்கல்கள் இந்தத் தீர்மானத்திற்குப் பிரதான காரணமாக அமைந்ததாக வெள்ளை மாளிகை வட்டாரங்கள் தெரிவிக்கின்றன.

அதிகரித்த அழுத்தங்கள்:

ஜனாதிபதி ட்ரம்பின் நெருங்கிய சகாக்களில் ஒருவராகக் கருதப்பட்ட போதிலும், அண்மைய காலங்களில் நோமினின் செயற்பாடுகள் குடியரசுக் கட்சிக்குள்ளேயே பலத்த விமர்சனங்களை எதிர்நோக்கியிருந்தன.

குறிப்பாக, வெள்ளை மாளிகையின் கொள்கை வகுப்பு மற்றும் ஒருங்கிணைப்புப் பணிகளில் நிலவிய குறைபாடுகள் தொடர்பில் கட்சி உறுப்பினர்கள் மற்றும் அதிகாரிகள் ஜனாதிபதியிடம் முறையிட்டு வந்தனர்.

வெள்ளை மாளிகையின் அதிரடி மாற்றம்:

நிர்வாகப் பணிகளில் காணப்பட்ட தேக்கநிலை மற்றும் அதிகாரிகள் மட்டத்தில் நிலவிய ஏமாற்றங்கள் காரணமாகவே இந்த பதவி நீக்க நடவடிக்கை எடுக்கப்பட்டுள்ளதாக அரசியல் ஆய்வாளர்கள் கருதுகின்றனர்.

ட்ரம்பின் இந்த அதிரடித் தீர்மானம், குடியரசுக் கட்சிக்குள்ளும் சர்வதேச அரசியல் அரங்கிலும் ஒரு புதிய அதிர்வலையை ஏற்படுத்தியுள்ளது.

தற்போதைய நிருவாகத்தின் ஸ்திரத்தன்மையைப் பேணுவதற்காகவே இத்தகைய மாற்றங்கள் மேற்கொள்ளப்படுவதாக வெள்ளை மாளிகை ஊடகப் பேச்சாளர் தரப்பில் சுட்டிக்காட்டப்பட்டுள்ளது.

அமெரிக்க உள்நாட்டுப் பாதுகாப்புச் செயலாளர் (Homeland Security Secretary) கிறிஸ்டி நோமினை (Kristi Noem) உடனடியாகப் பதவியிலிருந்து நீக்குவதாக ஜனாதிபதி டொனால்ட் ட்ரம்ப் அறிவித்துள்ள நிலையில், அவருக்குப் பதிலாக ஓக்லஹோமா மாநில செனட்டர் மார்க்வைன் முல்லின் (Markwayne Mullin), புதிய செயலாளராக நியமிக்கப்படவுள்ளார்.

தனது 'ட்ரூத் சோஷியல்' (Truth Social) தளத்தில் இது குறித்து பதிவிட்டுள்ள ஜனாதிபதி ட்ரம்ப், கிறிஸ்டி நோமின் சேவையைப் பாராட்டியுள்ளதுடன், அவர் குறிப்பாக எல்லைப் பாதுகாப்பு விவகாரங்களில் சிறப்பான பெறுபேறுகளைக் காட்டியுள்ளதாகக் குறிப்பிட்டுள்ளார்.

பதவியிலிருந்து நீக்கப்பட்டுள்ள நோமின், மேற்கு அரைக்கோளத்திற்கான புதிய பாதுகாப்பு முன்னெடுப்பான ‘Shield of the Americas’ அமைப்பின் விசேட தூதுவராக நியமிக்கப்படவுள்ளதாக ஜனாதிபதி அறிவித்துள்ளார்.

பதவி நீக்கத்திற்கான பின்னணி:

ஜனாதிபதி ட்ரம்பின் தீவிர ஆதரவாளராகக் கருதப்பட்ட போதிலும், அண்மைய காலங்களில் கிறிஸ்டி நோமின் மீது பல்வேறு கடுமையான விமர்சனங்கள் முன்வைக்கப்பட்டிருந்தன. குறிப்பாக:

விளம்பர சர்ச்சை: உள்நாட்டுப் பாதுகாப்புத் திணைக்களத்தின் நிதி ஒதுக்கீட்டில் பாரிய தொகையைச் செலவிட்டு, தன்னை முன்னிலைப்படுத்தும் வகையிலான விளம்பரக் பிரச்சாரங்களை முன்னெடுத்தமை.

அரசியல் அழுத்தம்: குறித்த விளம்பரக் பிரச்சாரத்திற்கு ஜனாதிபதியின் அனுமதி கிடைத்ததாக அவர் நாடாளுமன்றக் குழு முன்னிலையில் தெரிவித்த கருத்தை ஜனாதிபதி ட்ரம்ப் பகிரங்கமாக மறுத்துள்ளார்.

நிர்வாகத் தவறுகள்: மினியாபோலிஸ் நகரில் அமெரிக்கப் பிரஜைகள் இருவர் சுட்டுக்கொல்லப்பட்ட சம்பவத்தைக் கையாண்ட விதம் மற்றும் அவரது தலைமை ஆலோசகர் கோரி லெவண்டோவ்ஸ்கியுடனான தனிப்பட்ட உறவு குறித்த சர்ச்சைகள்.

புதிய செயலாளராக மார்க்வைன் முல்லின்:

புதிய செயலாளராகப் பெயரிடப்பட்டுள்ள மார்க்வைன் முல்லின் எதிர்வரும் மார்ச் 31ஆம் திகதி பதவியேற்கவுள்ளார். முல்லினை ஜனாதிபதி ட்ரம்ப் தெரிவு செய்தமைக்கு, அவர் ஊடகங்களில் ஜனாதிபதிக்கு ஆதரவாக முன்வைக்கும் காத்திரமான வாதங்களே காரணம் என வெள்ளை மாளிகை வட்டாரங்கள் தெரிவிக்கின்றன. மார்ஷல் ஆர்ட்ஸ் (MMA) வீரரான முல்லின், குடியரசுக் கட்சிக்குள் செல்வாக்கு மிக்க ஒருவராகக் கருதப்படுகிறார்.

அதிகாரிகள் மட்டத்தில் வரவேற்பு:

கிறிஸ்டி நோமினின் பதவி நீக்கம் குறித்து கருத்துத் தெரிவித்துள்ள உள்நாட்டுப் பாதுகாப்புத் திணைக்கள அதிகாரிகள் சிலர், இது நீண்ட காலத்திற்கு முன்னரே நடந்திருக்க வேண்டிய ஒன்று எனத் தெரிவித்துள்ளனர்.

நோமின் நிருவாகத்தின் கீழ் திணைக்களத்திற்குள் நிலவிய அமைதியற்ற சூழல் மற்றும் அவரது ஆலோசகரின் தலையீடுகள் காரணமாக அதிகாரிகள் கடும் அதிருப்தியில் இருந்ததாகக் கூறப்படுகிறது.