ஓவன் சவுண்ட் அருகே பனிக்கட்டியில் சிக்குண்ட 23 பேர் மீட்பு: 'அங்கு மக்கள் கதறி அழுதனர்' என மீனவர் வாக்குமூலம்!

கனடாவின் ஒன்டாரியோ மாகாணத்தில் உள்ள ஜார்ஜியன் வளைகுடா பகுதியில் பனிக்கட்டி உடைந்து கரையிலிருந்து பிரிந்ததால், பனியில் மீன்பிடித்துக் கொண்டிருந்த 23 பேர் ஞாயிற்றுக்கிழமை சிக்கிக்கொண்ட நிலையில், அவசர மீட்பு குழுவினர் ஹெலிகாப்டர் மூலம் அவர்களை பாதுகாப்பாக மீட்டனர்.

ஒவென் சவுண்ட் (Owen Sound) கடற்கரை அருகே பால்மி பீச் (Balmy Beach) பகுதியில் கரையிலிருந்து சுமார் ஏழு கிலோமீட்டர் அகலமான பெரிய பனிக்கட்டி திடீரென பிரிந்ததாக தெரிவிக்கப்படுகிறது. இதனால் அந்தப் பகுதியில் மீன்பிடித்துக் கொண்டிருந்தவர்கள் பனிக்கட்டியுடன் கடலுக்குள் மிதந்து சென்றனர்.

பனியில் சிக்கியிருந்த மீனவர்களில் ஒருவரான கேவின் ஃபாக்ஸ் (Kevin Fox) கூறுகையில், “தண்ணீர் பிளந்து வர ஆரம்பித்தது, பனி விரைவாக திறக்க ஆரம்பித்தது. சில நிமிடங்களில் நிலைமை மிகவும் ஆபத்தானதாக மாறியது” என தெரிவித்தார்.

மற்றொரு மீனவரான அல்ஃபி ஹோ (Alfie How) கூறுகையில், “முதலில் இரண்டு அடியளவு மட்டுமே இருந்த நீர் இடைவெளி, சில நிமிடங்களில் ஒரு கால்பந்து மைதானம் அளவுக்கு பெரிதாகிவிட்டது. அதற்குள் நாம் எதுவும் செய்ய முடியவில்லை” என்றார்.

தொடர்ந்து காற்றும் அலைகளும் அதிகரித்ததால் அவர்கள் இருந்த ஏழு கிலோமீட்டர் அகலமான பனிக்கட்டி பின்னர் ஒரு கிலோமீட்டருக்கும் குறைவான அளவுக்கு சுருங்கியது.

இந்த நேரத்தில் மீனவர்கள் அவசர எண் 911க்கு அழைத்திருந்தாலும், வானிலை மோசமாக இருந்ததால் முதலில் படகுகளும் ஹெலிகாப்டர்களும் செல்ல முடியாது என்று தெரிவிக்கப்பட்டது.

“அப்போது சிலர் தங்கள் குடும்பத்தினருக்கு அழைத்து விடைபெற்றனர். நாங்கள் உயிர் பிழைப்போமா என்றே தெரியாத நிலைமை இருந்தது” என ஹோ கூறினார்.

எனினும் சில நேரத்தில் ஒன்டாரியோ மாகாண காவல்துறை (OPP) மற்றும் Air Ornge அவசர மருத்துவ ஹெலிகாப்டர்கள் சம்பவ இடத்துக்கு வந்தன.

முதலில் பனிக்கட்டியில் இருந்து நீரில் விழுந்திருந்த ஐந்து பேர் மீட்கப்பட்டனர். பின்னர் மீதமிருந்த 18 பேர் மூன்று பேர் வீதம் ஹெலிகாப்டர் மூலம் கரைக்கு கொண்டு செல்லப்பட்டனர்.

மீட்பு நடவடிக்கையில் OPP விமான பிரிவு, OPP கடல் பிரிவு, பல தீயணைப்பு படைகள், அவசர மருத்துவ சேவைகள், இயற்கை வள அமைச்சு உள்ளிட்ட பல அமைப்புகள் இணைந்து செயல்பட்டதாக தெரிவிக்கப்படுகிறது.

மீட்கப்பட்ட 23 பேரும் தற்போது நலமாக இருப்பதாகவும், தங்களை காப்பாற்றிய மீட்பு குழுவினருக்கு அனைவரும் நன்றி தெரிவித்துள்ளதாகவும் தகவல்கள் கூறுகின்றன.