யுத்த முடிவில் வடக்கு மக்களால் இராணுவத்திடம் கையளிக்கப்பட்ட உறவுகளுக்கு மரணச் சான்றிதழ் பெற்றுக்கொள்ளுமாறு அழுத்தம்!

யுத்த முடிவில் வடக்குத் தமிழ் மக்கள் தமது கைகளாலேயே அரசாங்கப் படையினரிடம் ஒப்படைத்த நெருங்கிய உறவுகளுக்கு என்ன நேர்ந்தது என்பதை வெளிப்படுத்துவதற்குப் பதிலாக, அவர்களுக்கு மரணச் சான்றிதழ்களைப் பெற்றுக்கொள்ளுமாறு அந்தப் குடும்பங்களுக்குத் தொடர்ந்தும் அழுத்தங்கள் பிரயோகிக்கப்பட்டு வருகின்றமை அம்பலமாகியுள்ளது.

வடக்கு - கிழக்கு யுத்தப் பாதிப்புக்குள்ளான மக்களுக்கான நீதி என்பது இன்னும் வெகுதூரத்தில் உள்ளதை உணர்த்தும் வகையில் இத்தகவல்கள் வெளியாகியுள்ளன.

வலிந்து காணாமல் ஆக்கப்பட்டோருக்கான உண்மையை வெளிப்படுத்துமாறு கோரி, 2017ஆம் ஆண்டு சர்வதேச மகளிர் தினத்தன்று முல்லைத்தீவில் ஆரம்பிக்கப்பட்ட தொடர் போராட்டத்தின் ஒன்பதாவது ஆண்டு நிறைவடைந்த தினத்திலும், வீதியில் இறங்கித் தனது தந்தைக்கு நீதி கோரிப் போராடும் இளம் பெண் ஒருவரின் ஊடாக இந்த விடயம் வெளிச்சத்திற்கு வந்துள்ளது.

இம்முறை சர்வதேச மகளிர் தினத்தன்று, வட மாகாணத்தின் ஐந்து மாவட்டங்களையும் பிரதிநிதித்துவப்படுத்தும் வகையில் வலிந்து காணாமல் ஆக்கப்பட்டோரின் உறவினர்கள் பாரிய எதிர்ப்புப் பேரணியொன்றை முன்னெடுத்தனர். 16 ஆண்டுகளுக்கு முன்னர் தமிழ் தாய்மார்கள் தமது அன்புக்குரியவர்களை இராணுவத்திடம் கையளித்த வட்டுவாகல் பாலத்திலிருந்து இந்தப் பேரணி ஆரம்பமானது.

இதன்போது, முல்லைத்தீவு மாவட்ட வலிந்து காணாமல் ஆக்கப்பட்டோரின் உறவினர்கள் சங்கத்தின் உறுப்பினரான சதுர்ஜனா ஊடகவியலாளர்கள் மத்தியில் கருத்துத் தெரிவிக்கையில், தனது தாயாரால் இராணுவத்திடம் ஒப்படைக்கப்பட்ட தனது தந்தைக்கு மரணச் சான்றிதழைப் பெற்றுக்கொள்ளுமாறு அண்மையிலும் கடிதம் ஒன்று கிடைத்துள்ளதாகத் தெரிவித்தார்.

இது குறித்து அவர் மேலும் கூறுகையில்:

"2009 யுத்தத்தின் போது அம்மாவே அப்பாவை இராணுவத்திடம் ஒப்படைத்ததாகக் கூறினார். அதற்கு அப்பால் எமக்கு எதுவுமே தெரியாது.

"இத்தனை வருடங்களாக அப்பா எங்கே என்ற கேள்விக்கு எவ்வித பதிலும் இல்லை. அண்மையிலும் அப்பாவுக்கு மரணச் சான்றிதழ் எடுக்குமாறு கடிதம் வந்தது.

"சரியான முடிவு தெரியாமல் நாம் ஏன் மரணச் சான்றிதழை எடுக்க வேண்டும்? எமது அம்மா அப்பாவை இராணுவத்திடம் ஒப்படைத்தார்.

"இவ்வளவு காலமும் பதிலளிக்காத அரசாங்கத்திற்கு நாம் ஏன் மரணச் சான்றிதழை எடுத்துக் கொடுக்க வேண்டும்? எமது அப்பா எங்கே என்று சொல்லும் வரை நாம் அதனைப் பெற்றுக்கொள்ள மாட்டோம்."

வலிந்து காணாமல் ஆக்கப்பட்ட உறவுகளுக்குத் தற்போதைய ஆட்சியின் கீழும் நீதி கிடைக்கும் என்பதில் நம்பிக்கையற்ற நிலையில், தனது தந்தைக்கு நீதி கேட்டுப் போராடும் சதுர்ஜனா, தமது உறவுகளின் விதியை வெளிப்படுத்தும் வரை அடுத்த தலைமுறையும் இந்தப் போராட்டத்தைக் கைவிடாது" எனத் தெரிவித்தார்.

"இப்போது அநுர (ஜனாதிபதி) வந்து புதிய செய்திகளைச் சொல்லி நாட்டை முன்னேற்ற வேண்டும் என நினைக்கிறார். நான் ஒவ்வொரு வருடமும் ஒரே ஒரு கேள்வியையே கேட்கிறேன் - எமது அப்பா எங்கே?

"இவ்வளவு காலமும் அப்பா வருவார் என்று அம்மா காத்திருக்கிறார். நாமும் அந்த எதிர்பார்ப்பில்தான் இருக்கிறோம். அப்பா உயிருடன் இல்லாவிட்டால் கூடப் பரவாயில்லை, அவருக்கு என்ன செய்தீர்கள் என்று சொல்லுங்கள்.

“எமக்கு வேறு எதுவும் தேவையில்லை. நாம் சிறு பிள்ளைகளாக இருந்தபோது எமக்கு எதுவும் புரியவில்லை. ஆனால் இப்போது எமக்கு பதில் தேவை. எமது அப்பா எங்கே? அவர் இல்லையென்றால் அவருக்கு என்ன செய்தீர்கள்?

"இதற்கான பதில் கிடைக்கும் வரை எமது அடுத்த தலைமுறையும் இந்தக் கேள்வியைக் கேட்டுக்கொண்டே இருக்கும். பதில் கிடைக்கும் வரை நாம் இங்கிருந்து நகர மாட்டோம்."

2009 மே மாதம் யுத்தம் முடிவுக்கு வந்ததிலிருந்து தமது கணவன்மார், பிள்ளைகள், சகோதரர்களைத் தேடிப் போராடி வரும் தமிழ் பெற்றோர்களில் இதுவரை சுமார் 400க்கும் அதிகமானோர் நீதி கிடைக்காமலேயே உயிரிழந்துள்ளதாக பிரதேச செய்தியாளர்கள் தெரிவிக்கின்றனர்.

வட்டுவாகல் பாலத்தில் இடம்பெற்ற இந்தப் போராட்டத்தின் போது கருத்துத் தெரிவித்த வலிந்து காணாமல் ஆக்கப்பட்டோரின் உறவினர்கள் சங்கத்தின் தலைவர் சுப்பிரமணியம் பரமானந்தம், 2018ஆம் ஆண்டு உருவாக்கப்பட்ட காணாமல் போனோர் பற்றிய அலுவலகத்தின் (OMP) மீது தமக்கு எவ்வித நம்பிக்கையும் இல்லையெனத் தெரிவித்தார்.

"அவர்கள் OMP என்ற ஒன்றை கொண்டு வந்தார்கள். அவர்களுக்கு நாம் தெளிவான சாட்சிகளுடன் ஐந்து பேரின் விபரங்களை வழங்கினோம். ஆனால் சிறிது காலத்தின் பின்னர் நாம் வழங்கிய அந்த ஆவணங்களைக் கூட அவர்கள் தொலைத்துவிட்டார்கள். பிறகு நாம் அவர்களை எவ்வாறு நம்ப முடியும்?"

சர்வதேச மகளிர் தினமான இன்று வடகிழக்கு பெண்களுக்கு இது ஒரு துக்க தினமாகும் எனத் தெரிவித்த அவர், சர்வதேச சமூகமே தமக்கு நீதியைப் பெற்றுத்தர வேண்டுமென மீண்டும் வலியுறுத்தினார்.

இதேவேளை, பயங்கரவாதத் தடைச் சட்டத்திற்கு (PTA) பதிலாக 'பயங்கரவாதத்திலிருந்து அரசினைப் பாதுகாக்கும் சட்டம்' (PSTA) என்ற புதிய சட்டத்தைக் கொண்டு வர அரசாங்கம் முயற்சிப்பதாக வலிந்து காணாமல் ஆக்கப்பட்டோரின் உறவினர்கள் சங்கத்தின் செயலாளர் சிவானந்தம் ஜெனிற்றா குற்றம் சாட்டினார்.

இவ்வாறான சட்டங்கள் ஊடாகத் தமிழ் மக்களின் போராட்டங்களை நசுக்க அரசாங்கம் திட்டமிட்டுள்ளதாகவும், இனப்படுகொலையின் அடையாளமாகத் திகழும் வட்டுவாகல் பாலத்தை அபிவிருத்தி என்ற போர்வையில் அழித்து வரலாற்றை மறைக்க முயற்சிப்பதாகவும் அவர் மேலும் தெரிவித்தார்.

பயங்கரவாதத் தடைச் சட்டத்தை நீக்கி, புதிய சட்டமூலத்தைத் திரும்பப் பெறுமாறு வலியுறுத்தி வடக்கு - கிழக்கில் 29,069 கையெழுத்துக்கள் அடங்கிய மனு ஒன்று கடந்த பெப்ரவரி இறுதியில் நீதி அமைச்சுக்கு அனுப்பி வைக்கப்பட்டிருந்தமை குறிப்பிடத்தக்கது.

"உலகத்தரம் வாய்ந்த நடிகர்கள்"

மத்திய கிழக்கில் தற்போது இடம்பெற்று வரும் போரின் பங்காளிகளே வடக்கு - கிழக்கு தமிழ் மக்களின் இனப்படுகொலைக்கும் பங்காளர்களாக இருந்தனர் என வன்னி மாவட்ட இலங்கைத் தமிழ் அரசுக் கட்சி (ITAK) பாராளுமன்ற உறுப்பினர் துரைராசா ரவிஹரன் தெரிவித்துள்ளார்.

முல்லைத்தீவில் இடம்பெற்ற வலிந்து காணாமல் ஆக்கப்பட்டோரின் உறவுகளின் போராட்டத்தின் போது உரையாற்றிய அவர், வடக்கு - கிழக்கு தமிழ் மக்களுக்கும் சிறுவர்களுக்கும் அழிவை ஏற்படுத்தத் தலைமை தாங்கிய முன்னாள் ஜனாதிபதிகளான மஹிந்த ராஜபக்ஷ மற்றும் கோட்டாபய ராஜபக்ஷ ஆகியோர், இன்று மத்திய கிழக்கு போர் நிலைமை குறித்து கவலை தெரிவிப்பது 'உலகத்தரம் வாய்ந்த நடிகர்களின் நடிப்பு' போன்றது என கடுமையாகச் சாடினார்.

அவர் அங்கு மேலும் உரையாற்றுகையில்:

"அண்மையில் ஒரு போர் வெடித்தது, அது இன்னும் தொடர்ந்து கொண்டிருக்கிறது என்பது நமக்குத் தெரியும். அந்தப் போருடன் சம்பந்தப்பட்ட அனைவரும் எமக்கு அழிவைத் தேடித்தந்தவர்களே.

"அது ஒரு பக்கம் இருக்க, மனிதாபிமான ரீதியில் பார்க்கும் போது சிறுவர்கள், குழந்தைகள் மற்றும் பெண்களுக்கு பாதிப்பு ஏற்படக்கூடாது என்பதில் மாற்றுக் கருத்து இல்லை. தமிழ் மக்களிடம் மனிதாபிமானப் பண்புகள் அதிகம் உள்ளன.

"ஆனால், எம்மீது குண்டுகளை வீசி எம்மை அழித்த மஹிந்த ராஜபக்ஷ மற்றும் கோட்டாபய ராஜபக்ஷ கும்பல், இன்று வெளிநாடுகளில் கொல்லப்படும் குழந்தைகள் மற்றும் கைக்குழந்தைகளின் எண்ணிக்கை பற்றிப் பேசிக் கொண்டிருக்கிறார்கள்.

"நாங்கள் உங்களுக்கு மிக அருகில்தானே இருந்தோம்? எம்மை இப்படி அழிக்கும் போது உங்களுக்கு எதுவும் தெரியவில்லை. இப்போது நீங்கள் உலகத்தரம் வாய்ந்த நடிகர்களைப் போல நடிக்கிறீர்கள். அதுதான் எமக்கு வேதனையாக இருக்கிறது."

துரைராசா ரவிஹரன் எம்.பி. இதன்போது வன்னித் தமிழ் மக்களுக்கு நீதியையும் நியாயத்தையும் நிலைநாட்டி, வலிந்து காணாமல் ஆக்கப்பட்டோரின் உறவுகளின் கண்ணீரைத் துடைக்க தற்போதைய அரசாங்கம் உடனடி நடவடிக்கை எடுக்க வேண்டும் எனவும் கோரிக்கை விடுத்தார்.

"இந்த அரசாங்கமாவது வந்தவுடன் ஒரு மாற்றமாக எமக்கு ஏதாவது செய்யும் என்றுதான் நாம் எதிர்பார்க்கிறோம். நாம் தொடர்ந்து பேசிக் கொண்டுதான் இருக்கிறோம். ஆனால் இவர்களும் தீர்வு வழங்குவதாகத் தெரியவில்லை.

விரைவாகத் தீர்வு வழங்கி இந்த மக்களுக்கு நியாயத்தைச் செய்ய வேண்டும் என்பதே எமது எதிர்பார்ப்பு. இலங்கை அரசாங்கத்தின் எல்லைக்குள் நாம் இந்த நாட்டின் பூர்வீகத் தமிழ் மக்கள்.

“எனவே, எம்மைப் புறந்தள்ளிவிட்டு இந்த நாடு சிங்களவர்களுக்கு மாத்திரமானது என்று கூற முடியாது. சிங்கள, தமிழ், முஸ்லிம் என அனைவருக்கும் சொந்தமான நாடு இதுவென்றால் நாமும் உங்கள் நாட்டுப் பிரஜைகளே.

எமக்குரிய நீதியையும் நியாயத்தையும் நீங்கள் வழங்கியே ஆக வேண்டும். அதனைத் தாமதிக்காமல் இந்த உறவுகளின் கண்ணீரைத் துடைக்க வேண்டும் என நாம் கேட்டுக்கொள்கிறோம்."

யுத்த முடிவில் இராணுவத்திடம் சரணடைந்த பின்னர் காணாமல் போனவர்கள் மற்றும் வலிந்து கடத்தப்பட்ட தமது உறவுகளுக்கு நாட்டுக்குள் நீதி கிடைக்கவில்லை என வலிந்து காணாமல் ஆக்கப்பட்டோரின் உறவினர்கள் சங்கம் தொடர்ச்சியாகக் குற்றம் சாட்டி வருகின்றது.

கடந்த பதினேழு வருடங்களாக அவர்கள் ஒருமித்த குரலில் சர்வதேச மத்தியஸ்தத்துடனான நீதியையே கோரி வருகின்றமை குறிப்பிடத்தக்கது.