இலங்கை கடற்பரப்பில் கொல்லப்பட்ட 84 ஈரானிய கடற்படையினரின் சடலங்கள் மத்தலையிலிருந்து ஈரானுக்கு அனுப்பி வைப்பு!
இலங்கையின் தெற்கு கடற்பரப்பில் அமெரிக்கத் தாக்குதலுக்குள்ளான 'IRIS DENA' போர்க்கப்பலில் உயிரிழந்த 84 ஈரானிய கடற்படையினரின் சடலங்கள், ஈரானுக்குக் கொண்டு செல்லப்பட்டுள்ளன.
மத்தல ராஜபக்ஷ சர்வதேச விமான நிலையத்திலிருந்து இன்று (13) இரவு 9:29 மணியளவில் விசேட விமானம் மூலம் இந்தச் சடலங்கள் ஈரானுக்கு அனுப்பி வைக்கப்பட்டன.
சம்பவத்தின் பின்னணி:
கடந்த மார்ச் மாதம் 4ஆம் திகதி, காலி துறைமுகத்திலிருந்து 40 கடல் மைல் தொலைவில் உள்ள சர்வதேச கடற்பரப்பில் இந்த ஈரானியக் கப்பல் தாக்குதலுக்கு உள்ளானது. இக்கப்பலில் சுமார் 180 ஊழியர்கள் பயணித்ததாகத் தகவல்கள் தெரிவிக்கின்றன.
தாக்குதலின் பின்னர், கடலில் தத்தளித்த 35 பேர் மீட்கப்பட்டு காலி கராப்பிட்டிய போதனா வைத்தியசாலையில் அனுமதிக்கப்பட்டனர்.
அமெரிக்காவின் அதிரடி ஒப்புதல்:
குறித்த ஈரானியக் கப்பலைத் தாம் தாக்கி அழித்ததாக அமெரிக்கப் பாதுகாப்புச் செயலாளர் பீட்டர் ஹெக்செத் (Pete Hegseth) பின்னர் உறுதிப்படுத்தினார்.
அமெரிக்க நீர்மூழ்கிக் கப்பல் (Submarine) ஒன்றிலிருந்து ஏவப்பட்ட டொர்பிடோ (Torpedo) ஏவுகணை மூலம் சர்வதேச கடற்பரப்பில் வைத்து இக்கப்பல் மூழ்கடிக்கப்பட்டதாக அவர் தெரிவித்தார்.
ஒருங்கிணைப்பு நடவடிக்கைகள்:
இலங்கையிலுள்ள ஈரானியத் தூதரகத்தின் நேரடி ஒருங்கிணைப்பின் கீழ், உயிரிழந்தவர்களின் சடலங்களைச் சொந்த நாட்டிற்கு அனுப்பும் நடவடிக்கைகள் முன்னெடுக்கப்பட்டன.
உயிரிழந்தவர்களின் குடும்பங்களுக்குத் தமது ஆழ்ந்த இரங்கல்களைத் தெரிவித்துள்ள ஈரானியத் தூதரகம், இத்தாக்குதலை ஒரு பாரிய சர்வதேச குற்றமாக வர்ணித்துள்ளது.
