'எம்மை உலகக் கிண்ணத்திலிருந்து எவரும் நீக்க முடியாது' - ட்ரம்ப்பின் எச்சரிக்கைக்கு ஈரான் கடும் சீற்றம்!
இந்த வருடம் நடைபெறவுள்ள உலகக்கிண்ணக் கால்பந்து போட்டிகளில் இருந்து ஈரானை நீக்குவதற்கு எவருக்கும் அதிகாரம் கிடையாது என ஈரான் தேசிய கால்பந்து அணி (Team Melli) அமெரிக்க அதிபர் டொனால்ட் ட்ரம்ப்பிற்கு மிகக் கடுமையான பதிலடியைக் கொடுத்துள்ளது.
ஈரானிய வீரர்களின் பாதுகாப்பைக் கருத்திற்கொண்டு அவர்கள் இப்போட்டிகளில் இருந்து விலகியிருக்க வேண்டும் என அதிபர் ட்ரம்ப் எச்சரிக்கை விடுத்திருந்த நிலையிலேயே, ஈரானிய அணி இந்த ஆவேசமான அறிக்கையை வௌியிட்டுள்ளது.
ஈரான் கால்பந்து அணியின் அறிக்கை:
அமெரிக்க அதிபரின் கருத்துக்குப் பதிலளித்துள்ள ஈரான் அணித் தரப்பு பின்வருமாறு தெரிவித்துள்ளது:
"உலகக்கிண்ணம் என்பது ஒரு வரலாற்றுச் சிறப்புமிக்க சர்வதேச நிகழ்வாகும். இதன் தீர்மானங்களை எடுக்கும் அதிகாரம் சர்வதேச கால்பந்து கூட்டமைப்பிற்கே (FIFA) உண்டு, தனிப்பட்ட எந்தவொரு நாட்டிற்கும் கிடையாது.
ஈரான் தேசிய அணி தனது வீரமிக்க புதல்வர்களின் தொடர்ச்சியான வெற்றிகள் மூலம் இந்தத் தொடருக்குத் தகுதி பெற்றுள்ளது.
எமது அணியை எவராலும் நீக்க முடியாது. மாறாக, உலகளாவிய ஒரு போட்டிக்கு வருகை தரும் அணிகளுக்குப் பாதுகாப்பு வழங்க முடியாத ஒரு நாடே 'நடத்தும் நாடு' (Host) என்ற தகுதியை இழக்க வேண்டும்."
ட்ரம்ப்பின் 'உயிர் பாதுகாப்பு' எச்சரிக்கை
முன்னதாக, தனது 'Truth Social' சமூக வலைத்தளத்தில் பதிவிட்டிருந்த அதிபர் ட்ரம்ப்:
"ஈரான் தேசிய அணி உலகக்கிண்ணத்திற்கு வருவதை நாம் வரவேற்கிறோம். ஆனால், அவர்களின் உயிர் மற்றும் பாதுகாப்பைக் கருத்திற்கொண்டு அவர்கள் அங்கு வருவது பொருத்தமானது என நான் நினைக்கவில்லை" எனக் குறிப்பிட்டிருந்தார்.
அமெரிக்கா மற்றும் இஸ்ரேல் இணைந்து ஈரான் மீது நடத்திய ஏவுகணைத் தாக்குதலில் ஈரானின் உச்சத்தலைவர் அயதுல்லா அலி காமேனி கொல்லப்பட்டதைத் தொடர்ந்து, இரு நாடுகளுக்கும் இடையே போர் மூண்டுள்ள நிலையில் இந்த எச்சரிக்கை விடுக்கப்பட்டுள்ளது.
அமைச்சர் மற்றும் வீரர்களின் நிலைப்பாடு
ஈரானின் விளையாட்டுத்துறை அமைச்சர் அஹ்மத் துன்யாமலி (Ahmad Donyamali) கருத்துத் தெரிவிக்கையில், "எமது தலைவரைப் படுகொலை செய்த ஒரு நாட்டில் நடைபெறவிருக்கும் போட்டிகளில் பங்கேற்பதற்கான சூழல் தற்போது இல்லை. எமது வீரர்கள் அங்கு பாதுகாப்பாக இருக்க முடியாது" என ஏற்கனவே தெரிவித்திருந்தார்.
கடந்த சில மாதங்களில் ஈரானின் மீது திணிக்கப்பட்ட போர்களில் ஆயிரக்கணக்கான மக்கள் கொல்லப்பட்டுள்ளதையும் அவர் சுட்டிக்காட்டினார்.
உலகக்கிண்ணத் தொடர்: ஒரு பார்வை
ஆரம்பம்: ஜூன் 11 முதல் ஜூலை 19 வரை (அமெரிக்கா, கனடா மற்றும் மெக்சிகோ ஆகிய நாடுகளில்).
ஈரானின் குழு: குழு 'G' (பெல்ஜியம், எகிப்து மற்றும் நியூசிலாந்து ஆகிய நாடுகளுடன்).
முதல் போட்டி: ஜூன் 16 அன்று நியூசிலாந்துடன் மோதவுள்ளது.
ஈரான் இப்போட்டிகளில் இருந்து விலகும் பட்சத்தில், அதற்குப் பதிலாக மற்றொரு நாட்டை இணைப்பது குறித்து பீபா (FIFA) அமைப்பிற்குப் பாரிய சிக்கல் ஏற்படும் என எதிர்பார்க்கப்படுகிறது.
