UAEஇன் ஃபுஜைரா துறைமுகம் மீது ட்ரோன் தாக்குதல்; ஹார்முஸ் நீரிணையில் பதற்றம் அதிகரிப்பு!
மத்திய கிழக்கில் அமெரிக்கா - இஸ்ரேல் மற்றும் ஈரான் இடையிலான போர் தீவிரமடைந்துள்ள நிலையில், ஐக்கிய அரபு அமீரகத்தின் மிக முக்கியமான எரிசக்தி முனையமான ஃபுஜைரா (Fujairah) துறைமுகம் ட்ரோன் தாக்குதலுக்கு உள்ளாகியுள்ளது.
சனிக்கிழமை (மார்ச் 14) அதிகாலை இடம்பெற்ற இந்தத் தாக்குதலில், துறைமுகத்தில் உள்ள எண்ணெய் சேமிப்புத் தொகுதிகள் சேதமடைந்து தீ விபத்து ஏற்பட்டுள்ளது.
வான் பாதுகாப்புப் பிரிவினரால் ட்ரோன்கள் சுட்டு வீழ்த்தப்பட்ட போதிலும், அதன் சிதறல்கள் விழுந்ததில் சில எண்ணெய் ஏற்றுமதி நடவடிக்கைகள் தற்காலிகமாக நிறுத்தப்பட்டுள்ளதாகத் தகவல்கள் தெரிவிக்கின்றன.
ஏன் இந்தத் தாக்குதல் முக்கியமானது?
மூலோபாய அமைவிடம்: ஃபுஜைரா துறைமுகமானது ஹார்முஸ் நீரிணையிலிருந்து சுமார் 70 மைல் தொலைவில், ஓமான் வளைகுடாவில் அமைந்துள்ளது.
மாற்றுப் பாதை முடக்கம்: ஹார்முஸ் நீரிணையை ஈரான் மூடினால், அதற்கு மாற்றாக எண்ணெயை ஏற்றுமதி செய்ய அமீரகம் பயன்படுத்தும் பிரதான தளம் இதுவாகும். அபுதாபியின் 'ஹப்ஷான்' (Habshan) எண்ணெய் வயலிலிருந்து வரும் குழாய் வழித்தடம் இங்கேயே முடிவடைகின்றது.
உலகளாவிய பாதிப்பு: உலகின் மிகப்பெரிய கடல்சார் சேவை மையங்களில் ஒன்றான இங்கு, ஆண்டுக்கு சுமார் 12,500 கப்பல்கள் வந்து செல்கின்றன.
ஹார்முஸ் நீரிணை: உலகின் 'எரிசக்தி தமனி'
உலகின் மொத்த எண்ணெய் விநியோகத்தில் சுமார் 20 சதவீதமானது (தினமும் 20 மில்லியன் பீப்பாய்கள்) இந்த ஹார்முஸ் நீரிணை ஊடாகவே கொண்டு செல்லப்படுகிறது.
ஈரானின் புதிய உச்சத்தலைவர் மொஜ்தாபா காமேனி, இந்த நீரிணையை ஒரு 'நெம்புகோலாக' (Lever) பயன்படுத்தி போக்குவரத்தைத் தடுக்குமாறு உத்தரவிட்டுள்ளார். இதனால் சர்வதேச எண்ணெய் சந்தையில் கச்சா எண்ணெய் விலை பீப்பாய் ஒன்றுக்கு 110 - 120 டொலர்களைத் தாண்டியுள்ளது.
இந்தியத் தாங்கிக் கப்பல்கள் பாதுகாப்பு
இத்தனை பதற்றங்களுக்கு மத்தியிலும், திரவமாக்கப்பட்ட பெட்ரோலிய வாயுவை (LPG) ஏற்றிச் சென்ற இரண்டு இந்தியத் தாங்கிக் கப்பல்கள் இன்று காலை ஹார்முஸ் நீரிணையை 'பாதுகாப்பாகக்' கடந்து இந்தியா நோக்கிப் பயணிக்கின்றன. ஈரானுக்கும் இந்தியாவுக்கும் இடையிலான இராஜதந்திர உறவுகள் சீராக இருப்பதால், இந்தியக் கப்பல்களுக்கு ஈரான் அனுமதி வழங்கியுள்ளதாகத் தெரிகிறது.
