அணு ஆயுதத் தடை ஒப்பந்தத்திலிருந்து வெளியேற ஈரானிய அரசியல்வாதிகள் அழுத்தம்!

பிரசுரிக்கப்பட்டது: 16 மணி நேரம் முன்

ஈரான் – அமெரிக்கா மற்றும் இஸ்ரேல் தமது தாக்குதல்களைத் தீவிரப்படுத்தி, ஈரானின் சிவில் அணுசக்தி நிலையங்கள், உருக்கு ஆலைகள் மற்றும் பல்கலைக்கழகம் ஒன்றைக் குறிவைத்துத் தாக்கி வரும் நிலையில், 'அணு ஆயுதப் பரவாமை ஒப்பந்தத்தில்' (NPT) இருந்து நாட்டை வெளியேற்ற ஈரானிய அரசியல்வாதிகள் அழுத்தம் கொடுத்து வருகின்றனர்.

சர்வதேச அணு ஆயுதப் பரவாமை ஒப்பந்தத்தில் (NPT) ஈரான் தொடர்ந்து நீடிப்பது அர்த்தமற்றது என்று ஈரானிய நாடாளுமன்றத்தின் தேசிய பாதுகாப்புக் குழுவின் பேச்சாளர் இப்ராஹிம் ரெசாய் தெரிவித்துள்ளார்.

"இந்த ஒப்பந்தம் எமக்கு எந்தப் பலனையும் அளிக்கவில்லை" என்று அவர் வெள்ளிக்கிழமை இரவு எக்ஸ் (X) தளத்தில் பதிவிட்டுள்ளார்.

தெஹ்ரான் பிரதிநிதி மாலெக் ஷாரியாட்டி கூறுகையில், இதற்கான முன்னுரிமைச் சட்டம் நாடாளுமன்ற இணையதளத்தில் ஏற்றப்பட்டுள்ளதாகவும், விரைவில் பரிசீலிக்கப்படும் என்றும் கூறினார்.

இந்தச் சட்டம் நிறைவேற்றப்பட்டால், ஈரான் NPT இலிருந்து விலகுவதுடன், ஷாங்காய் ஒத்துழைப்பு அமைப்பு (SCO) மற்றும் பிரிக்ஸ் (BRICS) போன்ற நட்பு நாடுகளுடன் இணைந்து "அமைதி வழி அணுசக்தி தொழில்நுட்பத்தை மேம்படுத்த புதிய சர்வதேச ஒப்பந்தத்தை" உருவாக்கும்.

சர்வதேச அணுசக்தி முகமை (IAEA) அரசியல் ரீதியாகச் செயல்படுவதாகவும், ஈரானிய அணுசக்தி நிலையங்கள் மீதான தாக்குதல்களுக்கு உடந்தையாக இருப்பதாகவும் ஈரான் குற்றம் சாட்டியுள்ளது.

மறைந்த உச்ச தலைவர் ஆயத்துல்லா அலி காமேனியின் மூத்த ஆலோசகர் முகமது மொக்பர் கூறுகையில், IAEA இயக்குநர் ரஃபேல் குரோசி தற்போதைய போரில் சிந்தப்படும் இரத்தத்திற்கு ஒரு "குற்றப் பங்குதாரர்" என்று சாடினார்.

வெள்ளிக்கிழமை அன்று அமெரிக்க மற்றும் இஸ்ரேலியப் படைகள் ஈரானின் பொருளாதாரத்தின் முதுகெலும்பாக விளங்கும் உள்கட்டமைப்புகள் மீது கடுமையான தாக்குதல்களை நடத்தின.

யாஸ்டில் உள்ள 'யெல்லோகேக்' (Yellowcake) உற்பத்தி நிலையம் மற்றும் அராக் அருகிலுள்ள கனநீர் வளாகம் மீது குண்டுவீச்சு நடத்தப்பட்டது.

புஷெர் அணுமின் நிலையத்தின் அருகாமையில் மூன்று ஏவுகணைகள் விழுந்துள்ளதால், ஒரு பெரிய கதிரியக்க விபத்து ஏற்படும் அபாயம் குறித்து IAEA எச்சரித்துள்ளது.

ஈரானின் மிகப்பெரிய உருக்கு ஆலைகளான இஸ்பஹானில் உள்ள 'முபாரக்கே' (Mobarakeh) மற்றும் அஹ்வாஸில் உள்ள 'குசெஸ்தான்' (Khuzestan) வளாகங்கள் கடுமையாகத் தாக்கப்பட்டன.

இதனால் உற்பத்தி நிறுத்தப்பட்டுள்ளதுடன் ஆயிரக்கணக்கான வேலைவாய்ப்புகள் கேள்விக்குறியாகியுள்ளன.

தெஹ்ரான் நகரம் கடந்த இரண்டு இரவுகளாக மிகக் கடுமையான குண்டுவீச்சுகளைச் சந்தித்துள்ளது.

ஈரானின் 90 மில்லியன் மக்களும் கடந்த ஒரு மாதமாக சர்வதேச சமூகத்துடன் தொடர்புகொள்ள முடியாதபடி இணையம் முழுமையாக முடக்கப்பட்டுள்ளது.

தெஹ்ரானில் உள்ள ஈரான் அறிவியல் மற்றும் தொழில்நுட்ப பல்கலைக்கழகம் (Iran University of Science and Technology) மீதும் வான்வழித் தாக்குதல் நடத்தப்பட்டுள்ளது. இதில் உயிரிழப்புகள் ஏற்படவில்லை என்றாலும், ஆராய்ச்சி கட்டிடங்கள் சேதமடைந்துள்ளன.