ஈரானின் IRGC அமைப்பைப் பயங்கரவாத அமைப்பாக ஆர்ஜென்டீனா பிரகடனம்; அமெரிக்காவுடன் இணைகிறது!
அமெரிக்காவின் ட்ரம்ப் நிர்வாகம் விடுத்த கோரிக்கையைத் தொடர்ந்து, ஈரானின் இஸ்லாமிய புரட்சிகர பாதுகாப்புப் படையை (IRGC) ஒரு பயங்கரவாத அமைப்பாக ஆர்ஜென்டீனா பெயரிட்டுள்ளது. இது தொடர்பான உத்தியோகபூர்வ அறிக்கையை அந்நாட்டு ஜனாதிபதி அலுவலகம் செவ்வாய்க்கிழமை வெளியிட்டது.
ஆர்ஜென்டீனா வரலாற்றில் மிக மோசமான குண்டுவெடிப்புச் சம்பவமாகக் கருதப்படும் 1994 ஆம் ஆண்டு புவெனஸ் அயர்ஸில் உள்ள 'AMIA' யூத சமூக மையத்தின் மீதான தாக்குதலுக்கு லெபனானை தளமாகக் கொண்ட ஹெஸ்புல்லா (Hezbollah) அமைப்பே காரணம் என ஆர்ஜென்டீனா குற்றம் சாட்டுகிறது.
இந்தத் தாக்குதலில் 85 பேர் கொல்லப்பட்டதுடன் நூற்றுக்கணக்கானோர் காயமடைந்தனர். இந்த ஹெஸ்புல்லா அமைப்பிற்கு IRGC ஆதரவு வழங்குவதாலேயே இந்தத் தடை விதிக்கப்பட்டுள்ளதாக ஆர்ஜென்டீனா தெரிவித்துள்ளது.
இந்த நடவடிக்கையின் மூலம் அந்த அமைப்புடன் தொடர்புடைய நிதிச் சொத்துக்களை முடக்குவதற்கும் (Financial Sanctions) ஏனைய செயல்பாட்டுக் கட்டுப்பாடுகளை விதிப்பதற்கும் வழிவகை செய்யப்பட்டுள்ளதாக ஜனாதிபதி அலுவலகம் தெரிவித்துள்ளது.
ஈரானின் ஷியா முஸ்லிம் மதகுருமார்களின் ஆட்சியைப் பாதுகாப்பதற்காக உருவாக்கப்பட்ட ஒரு உயரடுக்கு இராணுவப் படையே IRGC ஆகும்.
இது ஈரானின் பொருளாதாரத்தின் பெரும் பகுதியைக் கட்டுப்படுத்துகிறது. அமெரிக்கா மற்றும் பல நாடுகள் ஏற்கனவே இந்த அமைப்பையும் ஹெஸ்புல்லாவையும் பயங்கரவாதக் குழுக்களாக அறிவித்துள்ளன.
ஜனாதிபதி ஜேவியர் மைலி (Javier Milei) தலைமையிலான ஆர்ஜென்டீனா அரசாங்கம், மெக்சிகோவின் 'ஜாலிஸ்கோ புதிய தலைமுறை கார்டெல்' (Jalisco New Generation Cartel) எனும் போதைப்பொருள் கடத்தல் குழுவையும் அண்மையில் பயங்கரவாத அமைப்பாகப் பெயரிட்டது.
இதன் மூலம் ஆர்ஜென்டீனா தனது வெளியுறவுக் கொள்கையை அமெரிக்காவுடன் (வொஷிங்டன்) மேலும் நெருக்கமாக்கியுள்ளது.
