ட்ரம்பின் உரைக்குப் பின்னரும் தணியாத பதற்றம்: ஹோர்முஸ் நீரிணை குறித்து பல நாடுகள் அவசர ஆலோசனை

முக்கிய கடல் வழிப்பாதையை மீண்டும் திறக்கும் பொறுப்பை நட்பு நாடுகளின் மீது அமெரிக்க ஜனாதிபதி சுமத்தியுள்ளார்.

ஈரானுடனான போர் குறித்த முக்கிய கேள்விகளுக்கு அவரது புதன்கிழமை உரை தெளிவான பதிலளிக்கத் தவறியதால், உலக சந்தையில் எண்ணெய் விலைகள் அதிரடியாக உயர்ந்துள்ளன.

ஹோர்முஸ் நீரிணை (Strait of Hormuz) மீதான ஈரானின் பிடியைத் தளர்த்துவதற்கான "சாத்தியமான அனைத்து" நடவடிக்கைகள் குறித்தும் ஆலோசிக்க 40 க்கும் மேற்பட்ட நாடுகள் வியாழக்கிழமை இணையவழி (Virtual) கூட்டமொன்றை நடத்தின.

பிரித்தானியாவினால் ஏற்பாடு செய்யப்பட்ட இக்கூட்டத்தில் உத்தியோகபூர்வ முடிவுகள் எதுவும் எட்டப்படவில்லை.

எந்த வகையிலாவது நீரிணையை மீண்டும் திறக்கும் பொறுப்பை நட்பு நாடுகள் ஏற்க வேண்டும் என டொனால்ட் ட்ரம்ப் வலியுறுத்தியுள்ளார்.

இது பிரான்ஸ் ஜனாதிபதி இம்மானுவேல் மக்ரோன் மற்றும் ட்ரம்ப் ஆகியோரிடையே தனிப்பட்ட ரீதியிலான கருத்து மோதல்களுக்கு வழிவகுத்துள்ளது.

சர்வதேச கடல்சார் அமைப்பின் (IMO) படி, ஈரானின் தடையால் சுமார் 2,000 கப்பல்கள் பாரசீக வளைகுடாவிற்குள் சிக்கியுள்ளன.

எனினும், ரஷ்யாவின் கப்பல்களுக்கு இந்த நீரிணை இன்னும் திறந்தே இருப்பதாக ஜனாதிபதி புடினின் உதவியாளர் தெரிவித்துள்ளார்.

ஈரானில் உயிரிழப்பு:

அமெரிக்க - இஸ்ரேலிய கூட்டுத் தாக்குதல்கள் தொடங்கி ஒரு மாத காலத்தில் ஈரானில் 2,000 க்கும் மேற்பட்டோர் உயிரிழந்துள்ளதாக ஈரான் செம்பிறை சங்கம் தெரிவித்துள்ளது.

லெபனான் நெருக்கடி:

லெபனானில் இஸ்ரேல் நடத்திய தாக்குதல்களால் 10 இலட்சத்திற்கும் அதிகமான மக்கள் இடம்பெயர்ந்துள்ளனர். அங்குள்ள புலம்பெயர் தொழிலாளர்கள் (Migrant Workers) இரண்டாவது முறையாகவும் இடம்பெயர வேண்டிய நிலைக்குத் தள்ளப்பட்டுள்ளனர்.

இஸ்ரேல் மீது தாக்குதல்:

வடக்கு இஸ்ரேலில் உள்ள ஒரு பாலர் பாடசாலை (Kindergarten) மீது நடத்தப்பட்ட தாக்குதலில் அதன் கூரை சேதமடைந்ததுடன், விளையாட்டு மைதானம் சிதைவடைந்தது.

ஈரான் - ஓமான் பேச்சுவார்த்தை:

ஹோர்முஸ் நீரிணை ஊடாக பாதுகாப்பான கடல் போக்குவரத்தை உறுதி செய்ய ஓமான் நாட்டுடன் இணைந்து ஈரான் புதிய நெறிமுறைகளை (Protocol) தயாரித்து வருகிறது.

உட்கட்டமைப்பு சேதம்:

அமெரிக்க - இஸ்ரேலிய குண்டுவீச்சால் ஈரானின் மிகப்பெரிய இரும்புத் தொழிற்சாலை ஒன்றின் செயற்பாடுகள் முற்றாக முடங்கியுள்ளன.

சைபர் தாக்குதல்:

அண்மைய "படுகொலைகளுக்கு" பழிவாங்கும் வகையில், பஹ்ரைனில் உள்ள அமேசான் கிளவுட் கம்ப்யூட்டிங் (Amazon Cloud Computing) மையத்தின் மீது தாக்குதல் நடத்தியதாக ஈரானின் புரட்சிகர இராணுவப் படை (IRGC) தெரிவித்துள்ளது.