புங்குடுதீவு மாணவி வித்தியாவின் கொலையாளி மீண்டும் பாலியல் வன்புணர்வு முயற்சி!
2015ஆம் ஆண்டு யாழ்ப்பாணத்தில் பள்ளி மாணவி சிவலோகநாதன் வித்தியாவைக் கூட்டு வல்லுறவுக்கு உட்படுத்திக் கொலை செய்த ஏழு குற்றவாளிகளில் ஒருவர், தான் அடைக்கப்பட்டுள்ள கண்டி, பல்லேகல சிறைச்சாலையில் கடமையிலிருந்த பெண் மருத்துவர் ஒருவரைப் பாலியல் துஷ்பிரயோகம் செய்ய முயன்றதாகக் குற்றம் சுமத்தப்பட்டுள்ளது.
சிறைச்சாலை வைத்தியசாலையில் சிகிச்சை பெற்று வரும் கைதியான ஜே.கோகிலன், அங்கிருந்த மருத்துவரைத் தழுவிப் பிடித்து வன்புணர்வு செய்ய முயன்றதாகக் காவல்துறையினர் தெரிவித்தனர்.
அந்தப் பெண் மருத்துவர் அபயக்குரல் எழுப்பியதைத் தொடர்ந்து, சிறைச்சாலை அதிகாரிகள் சம்பவ இடத்திற்கு விரைந்து வந்து அவரைக் காப்பாற்றியதாகக் காவல்துறையினர் கூறினர்.
இது குறித்து பல்லேகல காவல்துறையினர் விசாரணைகளை மேற்கொண்டு வருகின்றனர்.
2017 செப்டம்பர் மாதம், யாழ்ப்பாண மேல் நீதிமன்றத்தில் நடைபெற்ற விசேட 'ட்ரயல்-அட்-பார்' (Trial-at-Bar) விசாரணையில், 2015 மே 13 அன்று இலங்கையின் புங்குடுதீவில் 18 வயதுடைய சிவலோகநாதன் வித்தியாவைக் கடத்தி, கூட்டு வல்லுறவுக்கு உட்படுத்திக் கொலை செய்தமைக்காக ஏழு நபர்களுக்கு மரண தண்டனை விதிக்கப்பட்டது.
இந்தச் சம்பவம் அந்த நேரத்தில் பள்ளி மாணவியின் வல்லுறவு மற்றும் கொலைக்கு எதிராக மக்கள் மத்தியில் பெரும் ஆத்திரத்தை ஏற்படுத்தியதோடு, நீதிகோரி நாடு தழுவிய போராட்டங்களுக்கும் வழிவகுத்தது.
2015 மே 15 அன்று மணற்காடு மயானத்தில் நடைபெற்ற வித்தியாவின் இறுதிச் சடங்கில் உள்ளூர் அரசியல்வாதிகள் உட்பட நூற்றுக்கணக்கான மக்கள் கலந்துகொண்டனர்.
