பாலிவுட்டின் 'இசைக்குயில்' ஆஷா போஸ்லே: ஒரு யுகம் முடிவுக்கு வந்தது!

இந்தியத் திரையுலகின் பழம்பெரும் பின்னணி பாடகியும், கலாசார அடையாளமுமான ஆஷா போஸ்லே (Asha Bhosle) தனது 92 ஆவது வயதில் காலமானார்.

மாரடைப்பு காரணமாக மும்பையிலுள்ள வைத்தியசாலையில் அனுமதிக்கப்பட்டிருந்த நிலையிலேயே அவர் உயிரிழந்ததாக அவரது மகன் உறுதிப்படுத்தியுள்ளார்.

எட்டு தசாப்தங்களுக்கும் மேலாக நீடித்த இவரது இசைப் பயணம், 12,000 க்கும் மேற்பட்ட பாடல்களுடன் பாலிவுட் இசையில் ஒரு பொற்காலத்தை உருவாக்கியிருந்தது.

இவரது மறைவு இந்திய இசைத்துறைக்கு ஈடுசெய்ய முடியாத பேரிழப்பாகக் கருதப்படுகிறது.

பிரதமர் மோடி இரங்கல்

ஆஷா போஸ்லேவின் மறைவுக்குப் பிரதமர் நரேந்திர மோடி விடுத்துள்ள இரங்கல் செய்தியில், "இந்தியா கண்ட மிகச் சிறந்த மற்றும் பன்முகத்தன்மை கொண்ட குரல்களில் ஒருவர்" எனப் புகழாரம் சூட்டியுள்ளார்.

அவரது அசாதாரண இசைப் பயணம் தேசத்தின் கலாசாரப் பாரம்பரியத்தை வளப்படுத்தியதுடன், உலகெங்கிலும் உள்ள கோடிக்கணக்கான இதயங்களைத் தொட்டுள்ளதாகவும் அவர் குறிப்பிட்டுள்ளார்.

தனித்துவமான குரல்: காதல் பாடல்கள் முதல் துள்ளல் இசைப் பாடல்கள் வரை எவ்வித சிரமுமின்றி பாடும் ஆற்றல் கொண்டவர். 'டும் மாரோ டும்' (Dum Maro Dum), 'பியா து அப் தோ ஆஜா' (Piya Tu Ab To Aaja) போன்ற பாடல்கள் இன்றும் இரசிகர்களின் மனதை விட்டு நீங்காதவை.

ஆர்.டி. பர்மன் கூட்டணி: இசையமைப்பாளர் ஆர்.டி. பர்மனுடனான இவரது கூட்டணி பாலிவுட் இசையில் ஒரு புரட்சியை ஏற்படுத்தியது. பர்மனின் பரிசோதனை முயற்சிகளுக்கு ஆஷாவின் குரல் பெரும் பலமாக அமைந்தது.

சர்வதேச அங்கீகாரம்: பிரித்தானிய பாடகர் பாய் ஜோர்ஜ் (Boy George) மற்றும் அவுஸ்திரேலிய கிரிக்கெட் வீரர் பிரட் லீ ஆகியோருடன் இணைந்து சர்வதேச ரீதியிலும் பாடல்களைப் பாடியுள்ளார்.

சகோதரி லதா மங்கேஷ்கருடன் ஒப்பீடு:

2022இல் மறைந்த தனது மூத்த சகோதரி லதா மங்கேஷ்கருடன் ஆஷா அடிக்கடி ஒப்பிடப்பட்டார். லதா மங்கேஷ்கர் செவ்வியல் இசையின் அடையாளமாகத் திகழ்ந்த வேளையில், ஆஷா தனது பாடல்களில் ஒரு துணிச்சலான மற்றும் சுறுசுறுப்பான ஆற்றலை வெளிப்படுத்தினார்.

இறுதிக் காலம்:

தமது 90 ஆவது வயதிலும் துபாயில் நேரடி இசை நிகழ்ச்சியை நடத்தி சாதனை படைத்த ஆஷா, "இசை எனது மூச்சு" எனப் அடிக்கடி கூறுவார்.

2026ஆம் ஆண்டு பிரித்தானிய இசைக்குழுவான 'கொரில்லாஸ்' (Gorillaz) உடன் இணைந்து அவர் பாடிய 'The Shadowy Light' எனும் பாடலே அவரது இறுதிப் பதிவாகக் கருதப்படுகிறது.

மும்பையில் இடம்பெறவுள்ள இவரது இறுதிச் சடங்குகளில் திரையுலகப் பிரபலங்கள், அரசியல் தலைவர்கள் மற்றும் ஆயிரக்கணக்கான இரசிகர்கள் கலந்துகொள்வார்கள் என எதிர்பார்க்கப்படுகிறது.