ஈரான் மீதான பொருளாதாரப் போர் தீவிரம்: எண்ணெய் ஏற்றுமதித் தளர்வுகளை நீக்க அமெரிக்கா தீர்மானம்!

ஈரானிய எண்ணெய் ஏற்றுமதி தொடர்பில் வழங்கப்பட்டிருந்த 30 நாள் கால அவகாசம் (Waiver) இந்த வாரத்துடன் காலாவதியாக அனுமதிக்கப்படும் என அமெரிக்க நிர்வாக வட்டாரங்கள் தெரிவித்துள்ளன. இதன் மூலம் ஈரான் மீதான 'அதிகபட்ச அழுத்தத்தை' (Maximum Pressure) அமெரிக்கா மீண்டும் தீவிரப்படுத்தியுள்ளது.

சர்வதேச சந்தையில் எரிபொருள் விலையைக் கட்டுப்படுத்துவதற்காக கடந்த மார்ச் 20 ஆம் திகதி அமெரிக்கத் திறைசேரியினால் வழங்கப்பட்டிருந்த இந்தத் தளர்வு, வரும் ஏப்ரல் 19 ஆம் திகதியுடன் முடிவுக்கு வருகின்றது.

ஈரானுக்கு எதிரான 'எபிக் ஃபியூரி' (Operation Epic Fury) இராணுவ நடவடிக்கைக்கு இணையாக, அமெரிக்கத் திறைசேரி திணைக்களம் தற்போது 'பொருளாதார ஆவேச' நடவடிக்கைகளை முழு வீச்சில் முன்னெடுத்து வருவதாக அதிகாரிகள் குறிப்பிட்டுள்ளனர்.

ஈரானிடமிருந்து எண்ணெய் கொள்வனவு செய்யும் சீனா போன்ற நாடுகளின் நிதி நிறுவனங்கள் மீது 'இரண்டாம் நிலைத் தடைகளை' (Secondary Sanctions) விதிக்கவும் அமெரிக்கா தயாராகி வருகின்றது.

அமெரிக்கத் திறைசேரி செயலாளர் ஸ்கொட் பெசென்ட் (Scott Bessent) இது குறித்து கருத்துத் தெரிவிக்கையில்:

"ஹோர்முஸ் ஜலசந்தியில் அமெரிக்கா மேற்கொண்டுள்ள முற்றுகையானது, எந்தவொரு சீனக் கப்பலும் அல்லது ஏனைய நாடுகளின் கப்பல்களும் ஈரானிய எண்ணெயைக் கொண்டு செல்வதை அனுமதிப்பதில்லை என்பதை உறுதிப்படுத்தும். அவர்கள் எண்ணெய் பெறலாம், ஆனால் ஈரானிய எண்ணெயை அல்ல."

சீனா தனது வருடாந்த எண்ணெய் கொள்வனவில் 8 வீதமானவற்றை (ஈரானின் எண்ணெய் ஏற்றுமதியில் 90%) ஈரானிடமிருந்து பெற்று வரும் நிலையில், இந்தத் தீர்மானம் சீனாவுக்கும் பெரும் நெருக்கடியை ஏற்படுத்தும் என எதிர்பார்க்கப்படுகிறது.

ஈரான் மற்றும் ரஷ்யா மீதான தடைகளைத் தற்காலிகமாகத் தளர்த்தியமைக்காக அமெரிக்காவின் இரு கட்சிகளைச் சேர்ந்த நாடாளுமன்ற உறுப்பினர்களும் நிர்வாகத்தைக் கடுமையாக விமர்சித்து வந்தனர். இந்த நிலையில், ரஷ்ய எண்ணெய் மீதான தளர்வுகளும் கடந்த சனிக்கிழமையுடன் முடிவுக்குக் கொண்டுவரப்பட்டமை குறிப்பிடத்தக்கது.

ஐக்கிய நாடுகள் சபையின் தடைகள் மீண்டும் அமுலுக்கு வந்துள்ள நிலையில், ஈரானுடன் மேற்கொள்ளப்படும் எந்தவொரு வர்த்தக நடவடிக்கையும் மேலதிக தடைகளைத் தூண்டும் என அமெரிக்கா எச்சரித்துள்ளது.