கனடாவின் ஒட்டாவா மற்றும் கியூபெக் பகுதிகளில் நிலநடுக்கம்: ரிக்டர் அளவில் 3.9 ஆகப் பதிவு!

கனடாவின் தலைநகர் ஒட்டாவா (Ottawa), கிழக்கு ஒன்ராறியோ மற்றும் மேற்கு கியூபெக் (Quebec) ஆகிய பகுதிகளில் இன்று (14) செவ்வாய்க்கிழமை மதிய உணவு வேளையில் நிலநடுக்கம் உணரப்பட்டுள்ளது.

ரிக்டர் அளவில் 3.9 ஆகப் பதிவான இந்த நிலநடுக்கம், இன்று மதியம் சுமார் 12:36 மணியளவில் ஏற்பட்டுள்ளது.

மையப்பகுதி: கியூபெக் மாகாணத்தின் ஷாவ்வில் (Shawville) நகருக்கு வடகிழக்கே 20 கிலோமீட்டர் தொலைவில் இதன் மையப்பகுதி அமைந்திருந்ததாக 'ஏர்த்குவேக்ஸ் கனடா' (Earthquakes Canada) அறிவித்துள்ளது.

பாதிப்புகள் மற்றும் பொதுமக்களின் அனுபவம்: நிலநடுக்கத்தின் போது கட்டிடங்கள் அதிர்வதையும், பாரிய கனரக வாகனங்கள் செல்வது போன்ற பாரிய சத்தத்தையும் உணர்ந்ததாகப் பொதுமக்கள் தெரிவித்துள்ளனர்.

ஒட்டாவா, ஃபிட்ஸ்ராய் ஹார்பர், ரிச்மண்ட் மற்றும் பெம்ப்ரோக் போன்ற பகுதிகளில் நில அதிர்வு பலமாக உணரப்பட்டுள்ளது.

ஓட்டர் லேக் பகுதியில் வசிக்கும் பொதுமக்கள், வீடுகள் குலுங்கியதில் சுவர்களில் இருந்த புகைப்படங்கள் மற்றும் அலங்காரப் பொருட்கள் கீழே விழுந்ததாகத் தெரிவித்துள்ளனர்.

இது குறித்துக் கருத்துத் தெரிவித்த ஷாவ்வில் நகர முதல்வர் பில் மெக்லியரி (Bill McCleary), இந்த நிலநடுக்கத்தால் பாரிய சொத்துச் சேதங்களோ அல்லது உயிரிழப்புகளோ இதுவரை பதிவாகவில்லை எனத் உறுதிப்படுத்தினார். நில அதிர்வு சுமார் 15 முதல் 20 வினாடிகள் வரை நீடித்ததாக அவர் மேலும் குறிப்பிட்டார்.

நிலநடுக்க ஆய்வாளர் கிறிஸ் பௌச்சர் (Chris Boucher) கருத்துத் தெரிவிக்கையில், மேற்கு கியூபெக் நிலநடுக்க வலயத்திற்குள் (Western Quebec Seismic Zone) இப்பகுதி அமைந்துள்ளதால், ஆண்டுதோறும் சராசரியாக 12 நில அதிர்வுகள் வரை இங்கு பதிவாகக்கூடும் எனத் தெரிவித்தார்.

இன்றைய நிலநடுக்கம் பரவலாக உணரப்பட்ட போதிலும், இதனால் பாரிய கட்டமைப்புச் சேதங்கள் ஏற்பட வாய்ப்பில்லை எனவும் அவர் சுட்டிக்காட்டினார்.

முன்னதாக கடந்த 2010ஆம் ஆண்டு ஜூன் மாதம் இப்பகுதியில் ரிக்டர் அளவில் 5 ஆகப் பதிவான நிலநடுக்கம் ஒட்டாவா மற்றும் கியூபெக் பகுதிகளில் பலத்த அதிர்வுகளை ஏற்படுத்தியிருந்தமை குறிப்பிடத்தக்கது.